Namminersorneq pillugu isumalioqatigiissitat sulinerat ingerlaqqissaaq

Taassuma ullumikkut ataatsimeeqatigiinneq naammagisimaarpaa.

Ataatsimiinnerput akuereqatigiippalaartumik ingerlanneqarpoq, siulittaasutullu sisamanik siunnersuuteqarpunga, ilaasortat tunuliaqutiminnut apuussassaannik, partiiminnilu oqaloqatigiissutigisassaannik. Nuummiilluta suligasuartitami ilaasortat kalaalersaasa ataatsimiinnermik unitsitsigallarnerannik pissutaasut aallaavigalugit siunnersuuteqarpunga, neriuutigaara ilimagalugulu taakku akuerineqassasut.

Siunnersuutikka sisamat tusagassiuutitigut saqqummiussinnaanngikkallarpakka, partiit suligasuartitami ilaasortaatitaqartut eqqissillutik oqaloqatigiissutigisinnaaniassammatigit. Pissangallunga, neriullungalu isumaqatigiilluta sulileqqissinnaalissalluta, ataasinngornerunissaa pissangallunga utaqqissavara. Kalaallimmi Nunaata namminersulernissaanut isumalioqatigiissitami qinikkatut ilaasortaavugut, partiillu ilaasortaatitaqartut tamarmik akuerisinnaasaannik isumaqatigiissuteqarniartariaqarluta. Isumalioqatigiissitap ataani, Aningaasaqarnermut Suliffeqarnermullu suligasuartitami siulittaasoq, Frank Jensen, naggasiivoq.

Taamaattorli isumalioqatigiissitami ilaasortat tamarmik Frank Jensenitulli isumalluartiginngillat.

Per Ørum Jørgensen Konservativineersoq illuatungeriit isumaqatigiissinnaanissaat qularnartoqartipaa.

- Isumaqatigiittoqassanersoq oqaatigisinnaanngilara. Illuatungeriinni isumaqatigiinngissuteqarpoq piumasaqaateqarlunilu, Per Ørum Jørgensen ataatsimiinnerup kingorna oqarpoq.

Ajornartorsiutit ilagaat nukissiuuteqarneq pillugu suliffeqarfiup DONG-ip nunatsinni isertitassaasa, tapiissutinut nunatta Danmarkimit pisartagaanut qanoq naatsorsorneqarnissaat.

Aamma kalaallit suliffeqarfiutigilerniagaata GONG-ip isertitassai qanoq naatsorsorneqassanersut.