Namminersorneq pillugu isumalioqatigiissitat siulittaasuata tullia ammanerulerpoq
Namminersorneq pillugu isumalioqatigiissitami isumaqatigiinngeqisuni, siulittaasup tullia Christian Mejdahl sakkortusaarpallaarunnaarluni maanna danskit uuliasioqatigiiffiannit DONGimit nunatsinni uuliasiornermit isertitaasinnaasussat ilanngullugit naatsorsuisoqarnissaa ammaffigilerpaa.
- Oqallinnerni pereersuni aamma piffissami qanittumi oqallinnissami tamanna ilanngunneqassaaq, politikeri Venstrenut ilaasortaasoq, pingasunngorpat ataatsimiinnissaq sioqqullugu taama oqarpoq.
Ataatsimiinnissami isumaqatigiinngissutit iliuuseqarfiginiarneqarput, tassami isumalioqatigiissitat sulinerat piffissaq kingulleq atorlugu kinguartinneqarmat, aningaasat assortuussutaanerat pissutigalugu.
Partiip naalakkersuisoqataasup Konservativit, Folketingimut isumalioqatigiissitamullu ilaasortaq Per Ørum Jørgensen oqaaseqartoralugu, oqaatigaat danskit uuliasiortitseqatigiiffiata DONGip Qeqertarsuup eqqaani qillerinerminit isertitariumaagassaanik nunatta pissarsisinnaanissaa itigartilluinnaritsik.
Nunatta tungaaniit isumaqartoqarpoq danskit nunatta eqqaanni uuliasiornermit isertitaat naatsorsuutinut ilaatinneqassasut, tassami danskit piumasarimmassuk kalaallit uuliasiortitseqatigiiffissaata GONG-ip uuliasiornermit isertitassai naatsorsuutinut ilanngunneqassasut.
