Namminersorneq pillugu Isumalioqatigiissitat ataatsimeereerput
Namminersorneq Pillugu Isumalioqatigiissitat Københavnimi ippassaq ataatsimiipput. Tassani Suleqatigiissitat; Aningaasarsiornermut Inuusssutissarsiutinillu Ineriartortitsinermut kiisalu Inatsisinik tunngaviusunik inatsisinullu inuiaat akornanni atuuttunut tunngasunik sammisaqartut nalunaaruteqarput. Nunatta uuliaqarsinnaanera iluanaarutissallu qanoq pineqarnissaat aamma tikinneqarlutik. Ataatsimiinneq pillugu Isumalioqatigiissitap siulittaasua Jonathan Motzfeldt naliliivoq:
- Aningaasarsiornikkut siunissami qanoq suleqatigiissinnaanerput nunanullu allanut tunngasutigut namminersornerup nalaani Kalaallit Nunaata nammineq aqulluni ingerlalernissaata nalaani qanoq pissuseqarnissaa- taakku marluk annertunerusumik eqqartorpavut.
Jonathan Motzfeldt oqarportaaq Danmarkip nunatsinnut ukiumoortumik aningaasaliissutigisartagai eqqartorneqartut.
- Piviusut tunngavigalugit ingerlaqqinnissaq siunissamilu aningaasatigut qanoq suleqatigiissinnaaneq peqqissaartumik isumaqatigiinngissuteqarfiusinnaasullu paaseqatigiiffiginiarlugit oqaloqatigiittoqarpoq. Nammineq naliliinini naapertorlugu ajunngitsumik naapeqatigiiffiginiarlugit oqaloqatigiittoqartoq oqarpoq.
Nunatta uuliaqarsinnaanera piffissami kingullermi Nunatsinni Danmarkimilu qinikkanit oqillisigineqarpoq.
-Uuliamik iluanaarutissanik takorluukkat maannakkut ilaatigut annertoorujussuarmik eqqartorneqartarput. Tamakkualu takkutissagaluarpata soorunami aamma eqqarsaatersorfigineqarsinnaapput, tassanilu qularnanngilaq tunngaviusumik isummerfissanik aamma peqassasugut. Kisianni naluarput uuliaqarnersoq uuliaqassappallu imaaliorsinnaanerit taava eqqartorneqassapput, kisianni Kalaallit Nunaata ulluinnarni ingerlanneqarnissaminut atorfissaqartitaasa paaseqatigiiffiunissaat pingaartorujussuuvoq- nunamut tulluta tamakku eqqartorpavut - aamma taamaattariaqarpugut.
Namminersorneq pillugu Isumalioqatigiissitat upernaaru aprilimi ataatsimeeqqissapput, tassani nunatta oqartussaassuseqarnikkut killiffianik sammisaq nanginneqassaaq, tassa suut anguneqarsinnaasut suullu maannakkorpiaq anguneqarsinnaanngikkallartut pillugit, nunanut allanut tunngasunut suleqatigiissitaq, nunatsinni Danmarkimilu nunanut allanut tunngasunut Pisortaqarfiit suleqateqarluni nalunaarusiussaaq.
