Namminersorneq pillugu isumalioqatigiisitami isumaqatigiikkunnaarput

Namminersorneq pillugu isumalioqatigiissitat, aningaasarsiorneq inuussutissarsiornerlu pillugit suleqatitaliaata ataatsimiinnissani pilersaarutaareersoq ,Nuummi sapaatip akunnerata naanerani aallartikkaluaannarlugu kipiinnarpaa, suleqatigiisitami kalaallit danskillu sinniisaasa aatsitassarsiornermi isertitat agguartarnissaannut tunngavissiarineqartut isumaqatigiissutigisinnaanngimmatigit. – Ataatsimiinnerput kipiinnartarialersimavarput isumaqatigiissinnaannginnatta, ataatsimiititaliaaqqap siulittaasua Frank Jensen, Danmarkimut utiinnartariaqalersoq oqarpoq.

Kalaallit ataatsimiititaliaaqqamiittut agguaqatigiittarnissamut tunngavissatut siunnersuutigineqartumut isumaqataanngillat. Ilaasortaaqataasoq Kuupik Kleist, Inuit Ataqatigiinneersoq, oqarpoq isertitat agguartarnissaannut tunngavissiaq pingaarluinnartuummat peqqissaaruttariaqartoq. Tunngavissiamili sunarpiaq aporfigineqarsimanersoq Kuupik Kleistip oqaatigisinnaannginnerarpaa. – Suliatsinnili suut tamarmik ataqatigiipput, ataqatigiissumillu iluarsiivigineqartariaqarlutik, Kuupik Kleist oqarpoq. Namminersorneq pillugu isumalioqatigiissitat septemberimi suliaminnik tamakkiisumik saqqummiussisussaapput, maannalu Aningaasarsiorneq aatsitassallu pillugit ataatsimiititaliaaqqami pissaaneqarniuttoqalernera saqqummiussinissamut sunniuteqarnerlussanersoq oqaatigineqanngilaq.