Namminersorneq pillugu ataatsimiititaliarsuaq sulinerminik aallartitseqqippoq

Ajornartorsiutigineqartunut ilaavoq, aatsitassarsiornermit uuliasiornermillu isertitarineqarumaartussat qanoq avinneqassanersut, isumaqatigiinniarnerillu aallartinnginnerini kalaallit Ataatsimiititaliarsuarmi ilaasortaasa avitseqatigiinnermi piumasaqaatitik suli attatiinnarpaat.

-Tassa piumasaqaatigisarput tassaajuarpoq, naligiimmik periarfissaqassasugut, Danmark Kalaallit Nunaallu. Pisortallu, tassa naalagaaffiup nunatsinni aatsitassarsiornermik uuliasiornermilluunniit isertitaat, nunatsinnilu pisortat pigisaannit isertitassat, naligiimmik naatsorsuinermi ilanngunneqassasut. Aamma Danmarkip nunatsinnut aningaasaliissutaat appartinneqassappata taava, aamma naalagaaffiup nunatsinni aatsitassarsioqataanerminut isertitai ilanngullutik naatsorsorneqassasut. Aningaasaqarneq inuussutissarsiornerlu pillugit suleqatigiissitami kalaallit sinnerlugit, Kuupik Kleist oqarpoq.

Ataatsimiititaliarsuarmilu isumaqatigiinniarnerni ajornartorsiutit ilaat, tassa uuliamik nioqquteqarnermit Kalaallit Nunaat isertitaqanngitsuussagaluarpat qanoq Danmarkimiit tapiisutigineqartartut ilineqassanersut Frank Jensenimit imatut erseqqissarneqarpoq.

Sammisatta ilaasa assigiinngitsunik paasineqarsinnaasarnerat ajornartorsiutaasarsimavoq. Maannali uuliamiit isertitat annertussusaat naapertorlugit Danmarki tapiisarunnaareersoq Kalaallit Nunaat isertitaqassaaraluarpat tapiissuteqartarneq uterfioqqissanersoq erseqqissarneqarpoq. Uagut isumaqaraluaratta Kalaallit Nunaat isertitaqassaaraluaruni tapiiffigineqaqqittalernissaminut pisinnaatitaasasoq, kalaallilli Kalaallit Nunaata taamatut pisinnaatitaaffeqannginneranik paasinnissimanerat uagut tusaatissatut tiguarput.

Frank Jensenip ilanngullugu oqaatigaa, aatsitassarsiornermik uuliasiornermillu isertitarineqarumaartussanut apeqqutigineqartut ataatsimiinnermi siullermi oqallisigineqarumaartut.