Namminersorlutik Oqartussat videokkut nakkutigineqalissapput
Namminersorlutik Oqartussat qitiusumik allaffeqarfiata ilaani videoliuutinik nakkutilliinermut atugassanik ikkussuisoqassasoq, tamannalu sukkanerpaamik pissasoq, Namminersorlutik Oqartussani isumannaallisaanermut akisussaasup, Daniel Gottrup-ip, tusagassiuutinut nalunaarummini neriorsuutigaa.
Allattoq Mads Ullerup
decembarip 05-at 2011 10:42
Namminersorlutik Oqartussanut sapaatit akunneri tallimat ingerlaneranni pingasoriarluni tillinniartoqareersorlu isumannaallisaanerup sakkortusineqarnissaanik aalajangertoqarpoq.
Namminersorlutik Oqartussanut tillinniartoqaqqinnginnissaa anguniarlugu allatigut aamma isumannaallisaasoqassaaq, isumannaallisaanerli pillugu tamakku sorpiaanersut oqaatigineqanngillat.
Namminersorlutik Oqartussat isumannaallisarneqarnerannut nalilersuineq tassungaannaq killeqanngilaq, Namminersorlutik Oqartussat qarasaasiaqarnikkut aaqqissuussaanerat aamma pequtinik qanoq isumannaallisaasoqarsinnaanersoq misissorneqarpoq.
Namminersorlutik Oqartussanut tillinniarsimasutut inuit pingasut pasineqarlutik politiinit tigummigallarneqarput.
