Namminersorlutik Oqartussat tillinniarfigiteqqipput

Tillinniarnermut atatillugu Politiit annertunerusumik ullumi kingusinnerusukkut aatsaat paasissutissiisinnaapput.

Kalaallit eqqumiitsuliortut tusaamasat sanalugaat ataasinngormat unnuakkut tillinneqarput, soorlu assammiut, ujammit, tajat iverutillu kuultinit sanaat.

Qilalukkat tuugaavi marluk aamma tillinneqarput, taakkulu killorneqarsimagunarput.

Kuglepenni, qilalukkap tuugaavaniipulik, illuttullu nuumigut kuultitalik, allisitsiutit allakkanullu ammaat qilalukkat tuugaavinik ipullit aamma tillinneqarput.

Angutit marluk, tillinniarnermut attuumassuteqarsinnaasut, takuneqarsimapput.

Angutip takuneqartup aappaa kalaalerpasippoq, 20-t 25-llu akornanni ukioqassangatinneqarluni, 160 centimeterit missaannik angissuseqarpoq, tuattuulluni, taartunik nujaqarpoq amitsukujuumik takkajaamik kiinaqarluni. Aappaluttumik iluatigut kavaajaaraqarpoq, saattumik, qiviunik oqorsaasikkamik, qaavatigut qaatigooqarluni, qaamasunillu qarleqarpoq.

Aappaa aamma kalaalerpasippoq, 160 centimeterit missaannik angissuseqarluni. Taanna taartunik atisaqarpoq, naatsumik nasartalimmik kavaajaqarluni.

Politiit KNR-imut ullaaq oqarput, pisuunnguallakkusulluni tillinniarnerusorigitsik. Oqaatigisinnaanngilaalli tillinniarnerit uku marluk Namminersorlutik Oqartussat allaffianni sapaatip-akunnerisa tallimat missaasa matuma siorna tillinniarnermut attuumassuteqarsinnaanersut.

Kalaallit sanalugaannik, pinnersaatinilluunniit kuultimik sanaanik, akikitsunnguanngorlugit neqeroorfigitissimagaanni pisisimagaanniluunniit Nuummi Politiinut saaffiginnittoqarsinnaavoq, oqarasuaat 32 14 48 - tassa 32 14 48 - atorlugu, politeeqarfimmulluunniit nammineq saaffiginninnikkut.