- Namminersorlutik Oqartussat Panbolu pisuupput
Sanaartugassanik suliassinneqartartup Kim Fritzep illut pineqartut sanavai. Illunik sanaartornerup aqunneqarnera taassuma amigaateqarsoraa, allamillu suliassaqanngikkaangami aatsaat taakkunannga suliassinneqaraangami sullittarpai:
- Panbomik suleqateqaraangatta ajornartorsiuteqartuartarpugut. Illunik taakkuninnga arlalinnik sanareerpugut, atortussanillu nassinneqaraangatta pinerit tamaasa amigaateqartarput.
Atortussat tikisinniarneqartarnerat ajornartorsiutaajuaannarmat. Ilaatigut utaqqikatannarsisarpoq, Kim Fritze, sanaartugassanik suliassinneqartartuni Fritze & Søn-imeersoq oqarpoq.
Illut marluk Oqaatsuniittut 2008-mi sanavai, sulili iserterfigineqaratik. Kikkut matumani ajornartorsiutaanersut aperaarput, nangaarianngiivillunilu akivoq:
- Panbop aamma Namminersorlutik Oqartussat akisussaaffigaat, kisianni Panbop akisussaaffigineruaa, Kim Fritze oqarpoq.
Panbo sutigut kukkussuteqartarnersoq taassuma ima nassuiarpaa:
- Amusartup ilaannik amigaateqarpugut, Panbollu timmisartukkut taakku nassiukkusunneq ajorpai, umiarsuakkulli nassiukkusuttarlugit. Taamaammat illut taakku marluk naammassisinnaanngilagut, Fritze oqarpoq, amusartullu atortussaanik qaammatini arfineq-marlunni arfineq-pingasuniluunniit utaqqisariaqartarnertik oqaatigalugu.
Panbo matumani kisimi ajornartorsiutaanngilaq, INI A/S-immi illut taakku akisussaaffigilerumanngilai, illut taakku marluk suli naammassineqarsimanngitsutut nalilerneqarmata.
Atortussanillu tikisitsiniaaluusaartarnermik ajornartorsiut Namminersorlutik Oqartussat akisussaaffigigaat Kim Fritze oqarpoq.
Taanna aamma isumaqarpoq Namminersorlutik Oqartussat Panbonik illuliortitertariaqanngitsut:
- Illu pineqartoq Kalaallit Nunaannut naleqqunnani Spaniap avannarpasinnerusortaanut naleqqunnerugunarpoq. Illup sananeqarnerani kukkusat amerlangaarmata ussippallaanngillat, Kalaallillu Nunaannut naleqqunnatik. Illunut taakkununnga nuuttut igalaat plastikkimik qallertarpaat illup ilua qiianarpallaarunnaarsinniarlugu, Kim Fritze oqarpoq.
