Namminersorlutik Oqartussat: NunaMinerals akiliisinnaajunnaartutut nalunaarutiginianngilarput

NunaMineralsip akilersuiunnaaqqanini sivitsorteqqissinnaajunnaarpaa. Taamaakkaluartoq Namminersorlutik Oqartussat ingerlatseqatigiiffiup akiliisinnaajunnaartutut nalunaarutiginissaanik pilersaaruteqanngillat.
Assi © : KNR
maajip 19-at 2016 06:22
Nutserisoq Simon Uldum -

Ingerlatseqatigiiffiup akiliisinnaajunnaaqqajaasup NunaMineralsip akilersuinerminik unitsitseqqanera Nunatta Eqqartuussisuuneqarfianit maannamut quleriarlugu akuersissutigineqarpoq. Taamaaliornikkut ingerlateqatigiiffik akiligassaqarfimminut illersugaavoq.

Sapaatiummalli tamaanga killeqartinneqarpoq. Tamatumalu malitsigisaanik akiligassaqarfigineqartut ingerlatseqatigiiffik akiliisinnaajunnaartutut nalunaarutigisinnaanngorpaat. Taamaaliortoqarusuppasinngilarli. Taakkununnga ilaapput Namminersorlutik Oqartussat 4 millionit koruunit sinnerlugit akiligassaqarfigineqartut:

- NunaMineralsip akiliisinnaajunnaartutut nalunaarutiginissaanik pilersaaruteqanngilagut, aningaasanik pissarnissaq ilimanaateqanngimmat.

Naalakkersuisut siulittaasuata naalakkersuisoqarfiani pisortaaneq, Søren Hald Møller KNR-imut taama oqarpoq, imalu nangilluni:

- Aamma NunaMineralsip akiliisinnaajunnaarneranik nalunaarutiginnittoqarsimanerannik tugasaqanngilagut, akiligassaqarfigineqartut allat qanoq iliornissarput pillugu ataatsimeeqatigisimannginnatsigik,  Søren Hald Møller oqarpoq.

 

Aningaasaliisussaqanngilaq

Akiligassaqarfigineqartut arlaliusut aamma ingerlatseqatigiiffiup akiliisinnaajunnaartutut nalunaarutiginissaa pissarsissutiginaviarunanngilaat, piginnittuusut Greenland Mining Management Londonimi inissisisimasut akiligassaqarfimminnut millionerpassuarnik akiligassaminnut aningaasaleerusuttunik pissarsisinnaasimarpasinngimmata.

Nunani tamalaani aatsitassanik niuerfiup ajorsaateqarfiunera soqutigineerussimaneralu aamma isertugaataanngilaq.

Namminersorlutik Oqartussat NunaMineralsimit 4,5 millionit koruuninik ernianillu akiligassaqarfigineqarput.

Nakkutilliineq eqqartuussissuserisutut suliffeqarfiup Nuummiittup Malling & Hansen Dammip isumagaa, ingerlatseqatigiiffillu akiliisinnaajunnaartutut nalunaarutigineqarsimanersoq tassanngaanniit aamma oqaaseqarfigineqarumanngilaq.

 

Annaassiniarnissamik pilersaarut iluatsinngilaq

NunaMineralsimi siorna novembarip qaammataani ataatsimeersuartoqarneranut atatillugu, akiligassaqarfigisat aaqqissuusseqqinnissaq pillugu isumaqatigiissuteqarfigineqarput. Aningaasalersuinissarli iluatsinneqarsimarpasinngimmat isumaqatigiissut taanna piginnittut naammassisinnaasimanngilaat.  

Taamaakkaluartoq Namminersorlutik Oqartussat namminneq akileraartartullu aningaasaataat annaaneqartutut isiginngilaat, naak koruuninnguamilluunniit takusaqanngikkaluarlutik.

- Naagga, aningaasat taakku aannaassiniarnermut pilersaarummut ilaapput. Pilersaarullu sulissutigineqartillugu annaaneqartutut isigineqarsinnaanngillat, Søren Hald Møller taama oqarpoq.