Namminersorlutik Oqartussat namminersortunut akimmisaartitsipput

Qulimiguulinnut mittarfiup ammaqqinneqarnissaanut itigartitsinermut Ineqarnermut, Attaveqarnermut Angallannermullu Naalakkersuisoqarfiup tusarniaanermut akissutaani Mittarfeqarfiit pisortanit pigineqartut illoqarfimmi timmisartunut mittarfimmik ingerlatsisut unammillerneqarnissaasa kissaatigineqannginnera, ilaatigut tunngavilersuutigineqarpoq. Tassami mittarfik amigartoorfiusaqisoq aningaasartuutaaqqimmat, tamanna ilaatigut qulimiguulinnik sullissinikkut matussutissaqartinniarneqarmat. Tamanna Atuagagdliutini allaaserineqarpoq.

Igloo Mountainip aamma Heli-Greenlandip itigartitsineq ajuusaarutigaat.

- Sisimiormiunik takornarianillu ussassaarinissamut pitsaasumik suliniuteqarniarluta isumaqaraluarpugut. Takornariat ikileriarsimaqaat, tamatumalu ilorraap tungaanut saatinniarnissaanut suliniuteqarnialeratta itigartinneqarpugut. Tamanna uggornarpoq, uatsinnuinnaanngitsoq, aammali allanut tamanut, Igloo Mountainimi siulersuisut siulittaasuat Klavs Sefeld Møller, Atuagagdliutinut oqarpoq.