Namminersorlutik Oqartussat ilisarnaatitaarput

Ilisarnaatit nittartakkatigoortut, atortussallu naqinneqarsimasut nutaanik ilisarnaatillit qaammatip ataatsip ingerlanerani piareersinnaanissaat naatsorsuutigineqarpoq.

Namminersorlutik Oqartussat tusagassiuutinut taama allapput.

Allannguut annertunerpaaq tassaavoq taaguut "Namminersorlutik Oqartussat" ilaatinneqanngimmat, ilisarnaatillu nalaani oqaasertat aamma danskisoortortaqanngillat, oqaasertallu kalaallisut tuluttullu allassimallutik.

Saqqummersitatigut ilisarnaatitaalersut nutaat siunertaraat Namminersorlutik Oqartussat suliffeqarfittut ataasiusutut avammut saqqummertarnissaasa qulakkeerneqarnissaa, saqqummersitatigut tamatigut nassiunneqartup Naalakkersuisut allattoqarfianeersuunerat ilisarnarsissallugu.

Saqqummersitat nanoq.gl-imi alakkarneqarsinnaapput.