Namminersorlutik Oqartussat Canadami aatsitassarsiulersaarneq pillugu: Kalaallit Nunaata killeqarfiinik sunniinerujussuussaaq
Nunavummi aatsitassarsiulersaartut Kalaallit Nunaata imartaa aqqutigalugu savimminissanik useqarluni assartuisalerusuppoq.
Aatsitassarsiulersaarneq Mary River Projectimik taaguuteqartoq, Pinngortitaleriffimmut siusinnerusukkut uissuumisitsinikuuvoq.
Taanna aatsitassarsiorfiup Baffinland Iron Mines Corporationimik taaguuteqartup pilersaarusiaraa.
Tassani aatsitassarsiorneq qangalili ingerlareerpoq, taamaakkaluartoq ingerlatseqatigiiffiup aatsitassarsiornini marloriaatinngortikkusuppaa, tamannalu umiarsuarnik savimminissanik assartuinerulernermik malitseqarsinnaavoq.
Immakkut angalanerulerneq issittup uumasuinut akornutaanerpaalissasoq ukioq kingulleq Pinngortitaleriffiup allaaseraa.
AAMMA ATUARUK Nunavummi aatsitassarsiornermik suliniut nunatsinni piniarnermut periarfissalutsitsisinnaasoq
Pinngortitaleriffiup uuliakoortoqarsinnaaneranik, arfernik aporsisoqarsinnaaneranik aqqutaanilu ajutoortoqaratarsinnaaneranik uparuarpaa.
Maanna aatsitassarsiulersaarneq pillugu avatangiisinut naalakkersuisoqarfik qisuariarpoq.
Aatsitassarsiorfimmi pillugu tusarniaaleruttorput, ima qulequtserlugu: "Canadami aatsitassarsiornerup ’Mary River Project’-ip killeqarfiit qaangerlugit sunniutissaanik naliliinerup tamanut ammasumik tusarniaassutigineqarnissaa".
Kalaallit Nunaata pisortatigoortumik Canadamut aatsitassarsiulernissamut akissuteqaatiliornissaminut tusarniaasoqassaaq.
Espoo-konvention
Espoo-konventionen tassaavoq FN-ip isumaqatigiissusiaa, killeqarfiit akimorlugit sanaartornermi avatangiisinik ajoqusiinginnissamik siunertaqartoq. Avatangiisinut naliliinernik, innuttaasunut tusarniaanernik, oqartussaasunik sumiiffimmi taassumunngalu soqutigisaqaqatigiinut tunngasunik aalajangersakkanik isumaqatigiissummik imaqarpoq. Espoo-konventionenimut isumaqatigiissummut Kalaallit Nunaat 1997-mi ilannguppoq.
Tusarfik: Namminersorlutik Oqartussat.
- Suliaq canadamiut suliarimmassuk, Naalakkersuisoqarfiup taamaallaat Espoomut nalunaarusiap iluarsaanneqarnissaa qinnuteqaatigisinnaavaa, piumasarisinnaanaguli, tusarniaanermi allaqqavoq.
Aatsitassarsiuleqatigiiffik Baffinland Espoo-rapportimik taallugu, nalunaarusiorput. Tassani suliniutip sunniutigisinnaasaanut nassuiaatinik nalilersuutinillu allaaserinnittoqartoq, Namminersorlutik Oqartussat allapput.
Nalunaarusiaq aatsitassarsiuleqatigiiffiup avatangiisinullu naalakkersuisoqarfiup akornanni isumaqatigiinngissutaavoq.
Tusarniaanermut tunngasunik naalakkersuisoqarfiup ingerlatseqatigiiffiullu akornanni akissuteqaatit Namminersorlutik Oqartussanit kakkiunneqarsimapput.
- Aatsitassarsiulersaarnermi killeqarfinnik qaangiisumik avatangiisinut qanoq sunniuteqarsinnaaneranik, naammattumik nalunaarusiarineqarsimanngitsoq naalakkersuisoqarfimmiit nalilerneqarmat, Espoomik nalunaarusiaq arlaleriarluni Baffinlandimut aaqqiissuteqarfigeqqusarsimagaluarlugu, akissuteqaatini erserpoq.
- Baffinlandip naalakkersuisoqarfik isumaqatiginngilaa, tusarniaanermilu naalakkersuisunit ernummatiginertunut sunniutaasinnaasunut naammattunik nalunaarusiorlutik isumaqarput.
Kinaluunniit aatsitassarsiornermut soqutiginnittoq tusarniaanermut oqaaseqarnissaanik naalakkersuisoqarfik innersuussivoq. Tusarniaaneq juunip 15-iani nalunaaqutaq 16.00 unissaaq.
Aatsitassarsiulersaarnermut killissamik qaangiinerujussuarnik ukuninnga kinguneqassasoq naalakkersuisoqarfik naliliivoq:
- Qilalukkanik qernertanik, Canadap aamma Kalaallit Nunaata akornanni nuttartunik akornusersuinissaq. Uumasooqatigiit taakku pitsaanngitsumik sunnerneqarpata, tamanna Kalaallit Nunaanni pisassiisarnermut kinguneqarsinnaavoq.
- Arfivinnik, Canadap aamma Kalaallit Nunaata akornanni nuttartunik akornusersuinissaq imaluunniit toqqaannartumik apugaqartarnissaq.
- Aarrinik akornusersuinissaq aammalu uumasooqatigiit uumaffiinut sunniinissaq.
- Ikkannersuarmi qaleraleqarfiusumi, Kalaallit Nunaanni Aningaasaqarnikkut Killeqarfiup (EEZ) iluani immami pinngortitami malussajasumiittumi mingutsitsinissaq.
- Ajutoortoqarnerani uuliaarluertoqarneranilu Kalaallit Nunaata imartaanut aamma timmissanut imarmiunut mingutsitsinissaq.
