Namminersorlutik Oqartussani pisortaq nutaaq
Kai Holst Andersen Roskilde Universitetimi ilinniarsimasuuvoq, aamma London School of Economics and Political Science-imit nunani tamalaani naalakkersuinikkut mastergrademik ilinniagaqarluni. A.P. Møller-Mærskimi nunanik tamalaanik suleqateqarnermik tamatuma saniatigut misilittagaqarpoq, ullutsinnilu EU-mi nunanik tamalaanik sullissivimmi atorfeqarluni.
Naalakkersuisut tusagassiorfinnut nalunaarutaat naapertorlugu, nunanut allanut pisortaqarfimmi pisortanngortussap Namminersorlutik Oqartussat nunanut allanut tunngasunut periusissaat piviusunngortitseqataaffigissavaa, taannami Nunanut allanut tunngasunut ministeeriaqarfimmi atorfeqarallarami ilusilersueqataaffigisimavaa. Taassuma saniatigut pisortaqarfiup aaqqissuussaanerata ineriartortinnissaa sulisullu piginnaanngorsarnissaat suliassarissavai.