Nammineq pisaat nerisarineqarnissaat kajumissaarutigaat
Nunavimmi marsip qaammataa tassaavoq nerisassanut peqqinnartunut pingaartitsiffiusoq.
Nerisassat peqqinnartut Nunavimmi peqqinnissaqarfiup nittarsaanniarpai. Nerisassammi piareersariikkat kissaannartarissat pisiniarfissuarnilu pisiarineqarsinnaasut, Nunavimmi innuttaasut amerlasuutigut nerisarisarpaat.
Nerisassat tamakku akisoqaat, peqqinnarpallaaratillu annerusumik tangeqaratik.
Innuttaasullu nerisassanik peqqinnartunik nerisassiornerusalernissaat Nunavimmi peqqinnissaqarfiup maanna suliniutigilerpaa, assersuutigalugu nunaqarfiit ilaanni igaffinnik tamanut ammasunik, innuttaasullu ataatsimoorlutik peqqinnartunik nerisassiorsinnaanermik ilinniarfissaannik ammaanialerlutik. Innuttaasut taamaallutik unnussiuaaqatigiillutillu nereqatigiissinnaassapputtaaq.
Quppersakkat nerisassanut peqqinnartunut tunngasut meeqqat atuarfiinut aamma agguaanneqarsimapput, meeqqat inuusuttuaqqallu mamakujunnik, naatsiianik panertunik, sodavandinillu nerisaqarpallaaratillu imigaqarpallaannginnissaat matumani anguniarneqarluni.
Ippassaq ulloq marsip ulluisa 27-at, Nunavimmi nerisatoqqanut ulloritinneqarpoq. Innuttaasut aalisakkanik, tuttut neqaannik, timmissanillu namminneq pisarisimasaminnik nerisassiornissaminnut kajumissaarneqarput. Nunavimmi innuttaasut peqqinnarnerusunik nerisaqarnissaat siunertaralugu Nunavimmi peqqinnissaqarfik ilaatigut taama suliniuteqartoq Canadami ilanngutassiortutta Marianne Stenbækip oqaluttuaraa.
