NAMMCO oqinaarpaat
Ukioq manna nunatsinni qilalugartassiissutit amerlingaatsiarneqaraluartut taamaattoq Atlantikup Avannaani miluumasut imarmiut pillugit Kommissionia NAMMCO Norgemi ataatsimeersuarmat, nunatsinniit peqataasuniit tupaallaatigineqartumik pisassiissutit amerlineqarnerat isorineqarpallaarsimanngilaq.
Qilalukkat ukioq manna pisarineqarsinnaasut naalakkersuisunit 100-nik ilaneqarput, taamatullu amerlassusilinnik qilalukkanik pisasseeqqinneq biologit innersuussutigisaaniit amerlanerungaatsiarput.
Kisianni taamaakkaluartoq NAMMCO-mi isornartorsiuinerit ingasappallaanngillat, naak ilimagineqaraluartoq tamanna isornartorsiorneqarujussuassasoq, Piniarnermullu naalakkersuisoq Finn Karlsen ima oqarpoq.
- 2006-imi marsimi Islandimi ataatsimiikkatta qilalukkat pillugit sakkortuumik saassutaarineqarpugut, pingaartumik 50-nik pisasseeqqiinnerput tunngavigalugu, Finn Karlsen oqarpoq.
Taama isornartorsiorneqarnerminnut aamma tunngavigineqararpaa qilalukkat pisassiissutigineqartut ikiliartuaartinneqartarnissaannik isumaqatigiissut nunatsinniit eqqortinneqarsimanngimmat.
- Massakkut ataatsimeersuarnissamut assut pissangasimagaluarpunga assullu naatsorsuutigisimagaluarpara suli sakkortunerusumik isornartorsiorneqarumaarluta tassami ukioq manna 100-nik pisassat ilagatsigit, Finn Karlsen oqarpoq.
Taanna unnersiorpoq tamarmiullutik tupaallaatigisaminnik isornartorsiorneqarpallaarsimannginnamik.
- Assut aqinaarparput, siornali isornartorsiuisartoq appikkaluarpoq taannali akivara atuisut tassa piniartut ilisimasaat pingaarnerutinneqartariaqartut, Finn Karlsen oqarpoq.
