Takunnittoq: Naluttarfik eqqorneqarmat inuit tuparujussuartut

Politiit erngerlutik takkupput naluttarfimmiittullu tamaasa qimagussorlugit. 
Ajutoornermi takunnittut ilagaat, Naluttarfimmi Malimmi annaassiniartartoq, Karale Kielsen.
 
- Tupannaqaaq, ujarak taama angitigisoq inuit akornatigoorami, Karale Kielsen oqarpoq.

AAMMA ATUARUK Qaartitsisoqarnerani naluttarfik eqqorneqartoq

Kalerrisaarisoqartoq

Inuit katillugit 50-t missaanniittut naluttarfimmiissimapput, inuillu 20-t missaanniittut nalunnguartarfimmiissimallutik, Kommuneqarfik Sermersuumit tusagassiisarnermut pisortaq, Lars Damkjær taama oqarpoq.

Igalaat eqqorneqarmata erngertumik kalerrisaarut toorneqarpoq.

- Uanga taamaattoq ingerlaannaq takugakku kalerrisaarut tooriartorpara pisoq ingasappallaaqimmat, ambulancet aggerniassammata, Karale Kielsen oqarpoq.  

AAMMA ATUARUK Qaartitsisoqarmat aqqut matuneqartoq

Annertuumik aqqunartitertoqarsimanngilaq, inuilli marluk igalaamit ujaqqanilluunnit eqqorneqarsimasut, politiit ilisimatitsipput. Inuit pineqartut napparsimmaviliaanneqarsimanngillat.

Ujaqqerivimmi qaartiterinerit tamarmik Kommuneqarfik Sermersuumi sanarfinermut immikkoortortamit unitsinneqarput, ajutoornerup misissuiffigineqarnerata naammassinissaata tungaanut.

Kommuneqarfik Sermersuumi tusagassiisarnermut pisortaq Lars Damkjær taama ilisimatitsivoq. 
Naluttarfiup iluarsartuunneqarnerata nalaani naluttarfik matoqqassaaq.

Inuit oqaloqateqarnissaminnik pisariaqartitsisut ikiorserniarlugit Kommuneqarfik Sermersooq 
attaveqarasuartarfissamik pilersitsivoq. Tassa tarnip pissusiinik ilisimasalimmik oqaloqateqatoqarsinnaavoq.
Attavigineqarsinnaasoq tassaavoq, 55 35 82.