Nalunami kuultisiorfimmut aningaasaliissutit marloriaatinngortikkaat
Aatsitassarsioqatigiiffiup AEX Goldip kuultisiorfik 2021-mi ammaqqinniarpaa.
Aningaasaateqarfiit marluk pineqartut Kujataani Nalunami kuultisiorfimmut aningaasaliinitik katillugit 15 millionit koruunininngaanniit 33 millionit koruuninut amerlivaat.
Vækstfonden Greenland Venturelu AEX Goldimut 15 millionit koruuninik siorna juulimi aningaasaleeqataapput. AEX Gold Canadami Torontomi qullersaqarfeqarpoq.
AEX Goldip Nalunami Napasorsuup Qooruani kuultisiorfik ammaqqinniarpaa. Nalunaq A/S, piiaasinnaanissamut akuersissuteqartoq, aqqutigalugu taamaaliorniarpoq.
AAMMA ATUARUK Aatsitassarsiornissamut suliniut Vækstfondenimit Greenland Ventureimiillu aningaasaliiffigineqartoq
Nalunami kuultisiorfimmit kuulti katillugit 11 tonsi 2004-p 2013-illu akornanni piiarneqarpoq.
Siullermik aningaasaliisoqarmat, Greenland Venturep Vækstfondenillu aningaasaliissutit amerlineqarsinnaanissaannut piginnaatitsissutit aamma qulakkeerpaat. Periarfissarlu taanna aningaasaateqarfiit marluk taakku maanna atorpaat.
- Aningaasaliissutit 18 millionit koruuninik ilaneqarnerisigut aningaasaliissutit siulliit marloriaatinngortinneqarput. Aatsitassarsioqatigiiffiup piiaasinnaalernissamut sulinera nukittorsarneqarpoq, kuultisiorfiup ingerlannissaanut nioqqutissiortuulernissaanillu qulakkiissalluni, aningaasaateqarfiit marluk taakku ataatsimut taama nalunaaruteqarput.
