Nalunaarut tunuarteqquaat

Avataasiorluni aalisarnermik nakkutilliineq pillugu nalunaarusiaq nutaaq Inatsisartut Aalisarnermut Ataatsimiititaliaata tunuartittariaqarsoraa. Taamaattumik naalakkersuisut kaammattorpaat Namminersornerullutik Oqartussat nalunaarutaat nr. 33 18. december 2006-imeersoq atorunnaarseqqullugu. Inatsisartut Aalisarnermut Ataatsimiititaliaani siulittaasoq Ane Hansen ima oqarpoq:

- Tassani aallaaviuvoq tunisassiorfinnik suliaqartut aammalu avataani aalisariutaatillit saaffiginninnikuummata nassuiaateqarlutillu taanna nalunaarut nutaaq imminnut kinguneqassasoq ukiumut 10-11.000 tonsit tungaannut tunisassarisinnaasatik annaassallugit. Ane Hansen nassuiaavoq.

Suliffeqarfiit avataasiutaatillillu aamma naatsorsuutigaat, nalunaarusiap nutaap nunami tunisassiorfimmik ataatsimik naleqarnissaa aamma Royal Greenland eqqarsaatigalugu kilisaammik ataatsimik tuniniaasariaqalersinnaalersinnaasoq.

- Royal Greenland Polar Seafoodillu pilersaarutigaat Aasianni raajaleriffik ammaqqinniarlugu tassanilu suliffiit 150-200-t tungaannut pineqarmata, taamaattumik naalakkersuisunut kaammattuutigivarput taanna nalunaarusiaq kingulleq tunuartillugulu pisoqqamut uternissaq innersuussutigalugu.

Sunartarpiaamiuna naammagineqanngitsoq?

- Allannguutituaq §10 stk. 8-mi pisoqqami – nunami suliffissuarmi tunisinermi igitassat peereerlugit aatsaat nalunaarsuisoqartaramik. Massakkulli nutaaq malillugu raajat puumut immiussuullugit tunisassiarineqartarput qaqinneraninngaanniit kiilui aallaavigalugit nalunaarsuusiortussanngoramik.

- Nunatsinni taanna pissusiusoq raajat qaqinneraninngaanniit puumiittut eqqarsaatigalugit nunamut tunigaangamikkit tunisat 30-35 procentit igittaramikkit imaluunniit igitassatut nalunaarsortaramikkit. Igitassatullu nalunaarsugassat ukiumut 10-11.000 tonsit annaasussaanngorlugit. Tassa tunuartitseqqusinermut tamanna tunngaviuvoq, Ane Hansen oqarpoq.

Ane Hansenip IA-meersup ilanngullugu oqaatigaa nalunaarutip tunuartinniarnissaanut nammineq aamma Siumumeersoq Kim Kielsenilu ataatsimiititaliamit ikinnerussuteqarlutik akerliusimallutik. Amerlanerussuteqarlutik tunuartitseqqusipput Lars-Emil Johansen, Siumut, Augusta Salling, Atassut aamma Jens B. Frederiksen, Demokraatit.