Nalunaarusiaq tunngavigalugu politiinut tunniussisoqarpoq
Inatsisit uniorlugit raajarniarnermi peqquserluttoqarneranik nalunaarusiaq tunngavigalugu Naalakkersuisuni ilaasortaasimasoq Inatsisartuni ilaasortaq Jørgen Wæver Johansen Nuummilu kommunalbestyrelsemi ilaasortaq Siumuneersoq Gorm Birkekjær Kjeldsen politiinut tunniussipput. Gorm Birkekjær Kjeldsen politiinut tunniussinertik pillugu ima oqarpoq:
- Naalakkersuisuni ilaasortaasimasoq Jørgen Wæver Johansen ilisimatippara nalunaarusiaq politimesterimut tunniukkiartussallugu paasineqarmat nalunaarusiaq Naalakkersuisut siulittaasuata Hans Enoksen-ip Aalisarnermullu Naalakkersuisuusimasup Rasmus Frederiksen-ip sivisuumik ilisimaarisimagaat, Gorm Birkekjær Kjeldsen nassuiaavoq.
Gorm Birkekjær Kjeldsen-ip nammineq ukiorpassuarni imarsiortutut aalisartutullu inuussutissarsiuteqarnini tunngavigalugit oqarpoq nalunaarusiami saqqummiunneqartut eqqortuusut namminerlu ukiut ingerlanerini pineqartut Namminersornerullutik Oqartussanut saqqummiuttarsimagaluarini manna tikilllugu kinguneqanngitsunik.
Gorm Birkekjær Kjeldsen oqarpoq piffissanngortoq iternga tikillugu massakkut misissuisoqarnissaa neriuutiginerarpaalu massakkut iliuuseqarnertik aalisartunit allanit taperserneqarumaartoq.
Politiinut tunniussineq pillugu nunatsinni politimesteri Anders Linnet ima oqarpoq:
- Ippassaq ualisukkut Gorm Birkekjær Kjeldsen allaffinnut iserpoq, nammineq Naalakkersuisunilu ilaasortaasimasoq Jørgen Wæver Johansen sinnerlutik Inatsisit unioqqutillugit raajarniarnermi peqquserluttoqarsimanera pillugu nalunaarusiamik tunniussiartorluni, tassungalu atatillugu nalunaarusiap saqqummiussai tunngavigalugit pinerluuteqartoqarsimaneranik politiinut tunniussilluni, Anders Linnet oqarpoq.
Aperigatsinni politiinut tunniussinermi aternik immikkut taasisoqarsimanersoq Anders Linnet akivoq aternik immikkut taasisoqarsimanngitsoq.
- Nalunaarusiaq aternik erseqqarissumik saqqummiussaqanngilaq, tamannalu pillugu politiinut tunniussisut Nuummi kommunalbestyrelsemi ilaasortaq Gorm Birkekjær Kjeldsen aamma Naalakkersuisuni ilaasortaasimasoq Jørgen Wæver Johansen paasissutissanik pineqartunut tunngassuteqartunik sukumiinerusumik nassuiaateqarnissaannik ullumi piumaffigissavakka.
-Taama sukumiinerusumik nassuiaatitsinissaq killisiuinissaq siunertaralugu piareersarnermut atavoq, Anders Linnet oqarpoq.
Anders Linnet oqarpoq killisiuisoqareerpat suliap annertussuia isikkualu naapertorlugu qanoq ingerlariaqqittoqarnissaa isummerfigineqarumaartoq.
Aalisarnermi peqquserluttoqarsimaneranik nalunaarusiaq Namminersornerullutik Oqartussanit sukumiissumik suli malersorneqanngilaq. Namminersornerullutik Oqartussani allaffissornermut pisortaaneq Kaj Kleist oqarpoq suliaq maannakkumiit sukumiissumik misissuiffigineqassasoq, suliallu misissuiffigineqaqqaarani avammut saqqummiunneqarsimanera kipiluttunarnerarpaa.
