Nalunaarusiaq: Kalaallit Nunaat pisooqataavoq
Kalaallit Nunaanni meeqqat 1974 sioqqullugu inunngortut pisinnnaatitaaffiinik, danskit meerartaannut sanilliullugit assigiinngisitsineq danskit naalagaaffiannit pilersinneqarsimasutut oqaatigineqartaraluarpoq.
- Ilumoortoq eqqorluavinnagu oqaluttuarineqarpoq, issittumi kulturi oqaatsillu pillugit ilinniagartooq, Jens Heinrich inatsisitigut ataataqanngitsut qulaajaaffigineqarnerannut suleqataasoq, aviisimi Kristeligt Dagbladimi apersorneqarluni oqarpoq.
- Pisut assigiinngitsorpassuit aalajangiisooqataasut paasivarput. Kalaallit Nunaanni Landrådi pisunut annertuumik suleqataasimavoq.
Aappariinerup avataani meeqqat inunngortut inatsitigut ataataqarnissaannik inatsit Kalaallit Nunaata kitaani 1963-imi atuutinneqalerpoq, Tunumi avannaanilu 1974-imi atuutsinneqalerluni.
Inatsisitigut ataataqarnissamik inatsit Danmarkimi 1937-mi atuutilerpoq.
Ataatassarsiuussisarneq pillugu malittarisassiortoqarpat, taamaaliorneq aappariinnerup avataatigut atoqatigiinnermik akuersaarnertut isigineqalernissaa Landsrådimit ernumagineqarsimasoq, Inatsisitigut ataataqanngitsut misissuiffigineqarneranni nalunaarusiami ilaatigut oqaluttuarineqarpoq.
Aningaasatigut annertuumik kinguneqarnissaa aamma ernummatigineqarsimavoq, ataataasup kisimiilluni meeraq aappariinerup avataani meerarisani aningaasatigut pilersorsinnaanngippagu, pisortanit aningaasalersorneqartussaammat, Jens Heinrich aviisimi Kristeligt Dagbladimi apersorneqarluni taamatut oqarpoq.
- Kalaallit Nunaanni upperisarsiornermi ileqqut ataqqineqarnerat patsisaagunarluni, ilaqutariinneq katissimallunilu aappariinneq taamaaliornikkut illersorniarneqarpoq, Jens Heinrich oqarpoq.
Danskit naalagaaffiat nalunaarusiami pinngitsuutinneqanngilaq. Nunasiaataanerup nalaani kalaallit inerissimanngitsutut kulturikkullu kinguarsimanerusutut Danmarkimit isigineqarput, taamaattumillu danskit inatsiliorneranni Danmarkimi meeqqat aappariinnerup avataani inunnngortut immikkut isiginiarneqanngillat, naluaarusiami ilaatigut taamatut allassimavoq.
Jens Heinrich nalunaarusiamik suliarinneqataavoq, aamma inatsisilernermik professoreq Linda Nielsen kiisalu tarnip pissussaanik ilinniagartooq Sniff Andersen Nexø.
Inatsisitigut ataataqanngitsut aaqqiissutissaannik nassaartoqarnissamik danskit naalakkersuisuisa pingaartikkaat ministeriunerup Lars Løkke Rasmussenip siornatigut oqaatiginikuuaa.
Inatsisitigut ataataqanngitsut kina ataataginerlugu paasinissaanut periarfissaqalernissaannik inatsisinut atortitsinermut ministereqarfiup aalajangiiffigisussaavaa.
Inatsisitigut ataataqanngitsut pillugit nalunaarusiaq Katuami pingasunngorpat junip 22-ani, unnukkut arfineq-marlunut tamanut saqqummiunneqassaaaq.
Nalunarusiaq taanna statsministeriaqarfiup nittartagaani kalaallisut qallunnaatullu atuarneqarsinnaavoq.
