Nalunaarusiaq: Aatsitassarsiorneq isumalluutigeqinagu

Nalunaarusiami erseqqissarneqarpoq, Nunatta aatsitassat uulialu kisiisa isumalluutiginiarsinnaangikkai. Ataatsimiititaliap siulittaasua, Minik Rosing, taama nassuiaavoq.

- Aatsitassat Kalaallit Nunaata pilimassuussutaasa ilaat nunami uninngapput, aningaasivittut paarnaarsartumiittuusillutik. Aningaasivik ammaraanni, aningaasallu tassaniittut atorlugit, taava kinguaassanut aningaasassaqanngilaq, Minik Rosing oqarpoq.

Ataatsimiititaliap naatsorsuinerisa takutippaat, suliat angisoorsuit amerlasoorsuugaluarpataluunniit, tamakkunannga Nunatta karsiata isertitai Danmarkimiit ataatsimoortumik tapiissutinik katillutik ikinerussasut. Nunarput taamaammat assigiinngitsunik arlalinnik aallutaqartariaqartoq, ataatsimiititaliaq tikkuaavoq. Minnerunngitsumillu Nunatta avatangiisini mianerisariaqarpai.

- Pissussutit uumassusillit nammanneqarsinnaasumik pissuseqarfigigaanni kinguaassiortuassapput. Taamaammat aalisakkanit milliardit koruuninik aningaasarsigaanni, aningaasat taakkua ukiumi tassani atorneqarsinnaapput, aappaaguanimi allanik aalisagaqassaaq. Aatsitassanilli milliardit koruuninut tunisigaanni, aningaasat tamatuminnga isertitat aningaasaateqarfimmut toqqorneqartariaqarput, taava toqqortat erniaat atorneqarsinnaapput. Taamaammat aatsitassassarsiornermit aningaasat isertinneqarsinnaasut amerlangaartorsuit tusaraanni, eqqaamasariaqarpoq, aningaasat tamaasa ataatsikkut atornissaat  iluaqutaanngimmat, Minik Rosing oqarpoq.

Nalunaarusiami inerniliussat Nuummi Ilimmarfimmi ullaatungaa nalunaaqutaq qulinut saqqummiunneqassapput, oqallisigineqarlutillu.