Nalunaarusiap isertuunneqarnissaa apeqquserpaa
Nalunaarusiarli ataatsimiititaliami naammassillugu suli suliarineqanngimmat isertuunneqarallarnissaa Godmand Rasmussenip aalajangiusimavaa.
Jens B. Frederiksen tamanna pillugu ima oqarpoq:
- Nalunaarusiap suliarineqarnissaa Kukkunersiuinermut Ataatsimiititaliap isumaginikuunngilaa, inatsisartunut ilaasortat tamanna aalajangernikuuaat. Taamaammat nalunaarusiaq naammassineqarmat inatsisartunut ilaasortanut tamanut nassiunneqarsimasussaagaluarpoq, isertuunneqarnissaanullu tunngavissaqanngilaq, Jens B. Frederiksen oqarpoq.
Suliaq ilungersunartorujussuummat, inunnullu pineqartunut kinguneqarsinnaammat nalunaarusiap isertuunneqarallarnissaa Godmand Rasmussenip aalajangerpaa. Tamanna pissusissamisuunnginnerluni? Jens B. Frederiksen ima akivoq:
- Nalunaarusiap imarisaanik Godmand Rasmussen saqqummiivoq, namminerlu akisussaaffigissallugu tamanna. Uanga imarisaanut oqaaseqarumanngilanga, paasissutissat isertortuummata, piaarnerpaamilli saqqummiunneqassasut ujartorpara, innuttaasut paasissutissat tamakku soqutigimmatigit, Demokraatit sinnerlugit Inatsisartunut ilaasortaq oqarpoq.
