Nalunaaqutsiortoq tigummineqarallassaaq

Nalunaaqutsiortoq ippassaq illuinnarsuumminik ujajaanianut pingasunut eqqaassisoq, toqutseriarsimasutut ullumi januaarip 30-ata tungaanut tigummigallagassanngortinneqartoq DR-imit tusarliunneqarpoq:

Nalunaaqutsiortoq pinngitsuunerarpoq oqarlunilu imminut illersorniarluni eqqaassisimalluni. Eqqartuussivimmit nalilerneqarpat imminut illersorniarluni taamaaliorsimasoq, taava pineqaatissinneqarnavianngilaq.

Eqqartuussissuserisup Helle Lokdamip killissaq sumiinnersoq ima naatsumik oqaatigaa:

- Inuttut saassunneqaraanni imminut illersortoqarsinnaavoq. Saassussineq nakuusernerusinnaavoq imaluunniit nakuuserfigineqarnissamik sioorasaarutaasinnaalluni. Aamma pisiniarfimminiitilluni ujajaanianit saassunneqaraanni illuinnarsuummillu qunusaarneqarluni, taava imminut illersortoqarsinnaavoq, Helle Lockdam oqarpoq.

Nalunaaqutsiortoq siusinnerusukkut arlaleriarluni ujajaaffigitittarsimavoq taamaattumillu pisiniarfimmini nerriviusap ataani ilumoortumik illuinnarsuummik piareersimasuuteqarsimalluni. Illuinnarsuunni tigoriarlugu ujajaaniat eqqaassimavai taliisigut tuiisigullu ikilersimallugit. Ujajaaniat marluk kingusinnerusukkut tigusarineqarput pingajuallu suli tigusarineqanngilaq. Ullumi ujajaaniat allat kiinarpallit nalunaaqutsiortumut allamut ujajaapput – tamatumuuna Københavnip avannaani Hellerupimi.