Nalliuttorsiorneq tusarnaartitsinermik malunnartinniarneqassaaq
Ukiut ingerlaneranni Hotel Hans Egede nipilersortartunik tusaamasanik nunatsinneersunik allamiunillu tikisitsisarsimavoq. Ukiut ingerlaneranni appisimaallattaasarsimasoq tassaavoq Rasmus Lyberth tupinnanngitsumillu nalliuttorsiornermi nipilersortussatut qaaqquneqarsimavoq.
- Nuummi ingerlatsinitsinni Rasmus Lyberth assigiinngitsutigut akuujuarsimavoq nalunngilarpullu maani nunaqqataasunit nuannarisaaqisoq. Pikkorilluinnartuuvoq aammalu ukiut 40-ut maani najugaqarninni nallersimaneqanngitsumik erinaqarluni, Hotel Hans Egede-mi pisortaaneq Helge Tang oqarpoq.
Rasmus Lyberth nipilersoqataasalu appisimaarnerisa saniatigut kalaallit nerisassaat sassaalliutigineqassapput. Tamannalu akunnittarfiup ukiuni 25-ni Nuup qeqqani sulinermi atorluartarsimavaa.
- Nerisassat pitsaasut nuannersumik misigisaqarnissamut aallarniutaalluartarput. Taamaattumik najuuttunut nerisassat pitsaasut sassaalliutigissavagut qularinngilaralu Rasmus Lyberthip nipilersoqataasa pulaartuatalu Aviaja Lumholtip sinnera isumagilluarsinnaajumaaraat. Unnuakkut pingasut qeqqata tungaanut qitittoqarumaarpoq, Helge Tang qungujulalluni oqarpoq.