Nalliuttorsiorneq meeqqat malunnartippaat
Namminersorlutik Oqartussat ilasseqatigiinnermut illuutaanni Hans Egedep illuani nalinginnaasumik nunanit allanit tikeraartut nuimasut ilasseqatigineqartarput, soorlu USA-p nunanut allanut ministeria Hillary Clinton.
Naalakkersuisut meeqqanik 20-inik sinerissameersunik Hans Egedep illuanut qaaqqusinerannut pissutaavoq Kalaallit Røde Kors-iat ukiormanna ukiunik 20-nngortorsiormat, meeqqallu qaaqquneqartut Nuup kujataani kangerlummi Ameralimmi aasarsioqqammerput.
Meeqqat Hans Egedep illuani ilassigiinnermi peqataareeramik naluttarfimmut Malik-mut nalukkiarput tassanilu nereqatigiillutik. Tamatuma kingorna pisiniarfeqarfissuarmut Nuuk Center-imut alakkaatinneqarput, kingorna kulturikkut illorsuup Katuap film-ertarfiani filmerlutik.
Suliffeqarfiit kattufiillu arlaqartut Kalaallit Røde Korsiata ukiuni 20-nngortorsiorneranut aningaasaliipput. Naak Nuummi sialleraluartoq meeqqat Nuummiinnerminni nuannisartinneqarput, illoqarfinnut najugaqarfigisimannut aallarnissartik sioqqullugu.