Nalliuttorsiorluni takutitsinissap aaqqissuunnera ingerlateqqinneqalerpoq
Peqatigiiffik Nanu Børn, Meeqqat Inuunerissut, Inuit Issittormiut Siunnersuisoqatigiivisa Inuusuttortai aamma Red Barnet, meeqqat nunatsinneersut nuna tamakkerlugu TV-ikkut katersuiniunnissat peqatigiillutik aaqqissuuniarpaat.
Katersuiniarnissaq siorna maajimi pisussatut pilersaarutigeqqaarneraluarpoq, isissutissalli tunineqartut ikippallaarnerat peqqutigalugu kinguartinneqarsimalluni. Katersuiniarnerup ingerlanerani nipilersortartut ilisimaneqarluartut soorlu, X-Factorimi ilaanikuusoq Linda, Basim aamma ABC kiisalu Dennis Knudsen, Julie, Søs Fenger, Nuuk Posse aamma Ulf Fleischer tusarnaaritsissapput. Taakku saniatigut atisanik takutitsisoqassaaq, tamatumani Isaksen Design, Lennert Design aamma Charlotte Sparre Design ilaatigut assilisittartup 2PM-imeersup Lykke Mayimit takutinneqassallutik.
- Allanngorneq aamma Kalaallit Nunaat meeqqat inuusuttuaqqallu toqqissinermik nassaarfigisinnaasaat kissaatigigivut nunarput nunarsuullu sinnera takutitseqataaffigiuk, Krissie Berthelsen Winberg peqatigiiffik Nanu Børnimeersoq kaammattuuteqarpoq.
Aliikkusersuineq KNR-ikkut aamma Nuuk TV-ikkut toqqaannartumik aallakaatinneqassaaq, tamatuma ingerlanerani sianertoqarsinnaavoq aningaasanillu tunisilluni. Oqarasuaatit inunnit ilisarisimaneqartunit tiguneqartassapput, tamanna aaqqissuisut neriorsuutigaat.
Nalliuttorsiorluni takutitsinissamut isissutissaq, nerineq imeruersatit Katuamilu aaqqissuussineq ilanngullugu 800 koruuninik akeqarpoq. Atisanik takutitsinissamuinnaq ualikkut ingerlanneqartussamut aamma isissutissanik pisisoqarsinnaavoq, inersimasumut 75 koruuneqarpoq meeqqamut 50 koruuneqarluni.
Katuap paarlersuani akeqanngitsumik meeqqanut inuusuttuaqqanullu arfininngornermi februaarip 27-anni tusarnaartitsisoqassaaq, tassani ABC, Basim, Julie, Nuuk Posse Søs Fengerilu tusarnaarneqarsinnaassallutik.
