Nalimmassaanermik iluarsartuusseqqinnissaq Hermannip akueriumanngilaa
![](/sites/default/files/styles/image_934x467/public/article_images/hermann_berthelsen_0.jpg?itok=zUBgy1qH)
Hermann Berthelsenip, Siumut, nalimmassaanermik iluarsartuusseqqinnissamik Naalakkersuisut siunnersuutaat naammaginngivippaa.
Qeqqata Kommuniani kommunalbestyrelsip 12 millionit koruuninik ikinnerusunik pissarsinissaq aallaqqaammut akuerigaluarpaa, soorlu tamanna pilersaarummi maanna taama allassimasoq.
AAMMA ATUARUK ATAATSIMUT ISIGALUGU Nalimmassaarinermik iluarsartuusseqqinnissaq ima oqaaseqarfigineqarpoq
Kommunalbestyrelsilli kingullermik ataatsimiinnerani siunnersuut taama isikkoqartillugu akuersissutigineqarnissaanut piumasaqaatigineqartut arlariit qulakkeeqqaarnissaat kissaatigineqarsimavoq.
- Naalakkersuisut juunip tallimaani ataatsimiinnitsinni piumasaqaatigisatsinnut naapertuutinngitsunik maanna saqqummiussaqarput, borgmester Hermann Berthelsen KNR-imut oqarpoq.
Isorineqartut arlaqarput
Qeqqata Kommuniani sanaartugassanut aningaasaliissutaasut innuttaasut amerlassusaannut naapertuunnginnerat ilaatigut uparuarpaa.
Ingerlatsiviit 50-it sinnerlugit sulisoqartut kisiisa nalimmassaanermi ilaatinneqarnissaat Hermann Berthelsenip aamma isumaqatiginngilaa, aammattaaq akileraartarnermut tunngasut ilaat, innuttaasut agguataarsimanerinut tunngasut isumaginninnikkullu aaqqissuussaanermut tunngasut ilanngunneqarsimanngillat.
- Tamakku Naalakkersuisut maanna nalunaarutigisaanni naammassineqarsimasutut takusinnaanngilagut, borgmesteri oqarpoq.
Oqaluusereqqaartinnagu akuerineqassanngilaq
Aningaasaqarnermut nunami namminermullu naalakkersuisumik Vittus Qujaukitsumik (Siumut) kiisalu nunatsinni kommunit sinnerini pingasuni borgmesterinik kommunip piumasaqaatai pillugit oqaloqateqarnissani neriuutigisimagaluarpaa.
AAMMA ATUARUK Asii Chemnitz Narup: Siunnersuut ernumanartoqarpoq
Maannali tassa naammatsippoq, namminerlu kommunimilu isumaa avammut nalunaarutigalugu.
- Kommunit allat aggustip sisamaani ataatsimeeqatigisussaagaluarpagut, nalimmassaanermik iluarsartuusseqqinnissaq kisiat qulequtaralugu. Tamanna pinngitsoortussatut maanna isikkoqarpoq.
- Taamaammat isumaqarpunga piumasaqaativut kissaativullu akuerineqarsimanngippata Qeqqata Kommuniata siunnersuutigineqartoq kingulleq, ilaatigut Qeqqata Kommunianit 12 millionit koruuninik pilliuteqarfigisassaat, akuerisinnaanngikkipput, Bertherlsen erseqqissaavoq.