Asii Chemnitz Narup: Siunnersuut ernumanartoqarpoq

Kommuunit akornanni aningaasanik nalimmassaarinermi Kommuneqarfik Sermersuup 56 million koruunit tunniutissavai, kisitsisillu takutippaat kommuninut allanut sanilliullugu Kommuneqarfik Sermersuup aningaasat inuttaasumut ataatsimut atugassai ikinnerpaassasut. Tamannalu Kommuneqarfik Sermersuumi borgermesterip, Asii Chemnitz Narupip naammaginartinngilaa:

- Tupigivara Naalakkersuisut isumaqassappata uagut innuttaasumut ataatsimut annikinnernik pissarsiaqarnitsigut aamma pitsaasumik kivitseqqissinnaassasugut. Aningaasaqarnermut naalakkersuisoq apererusunnarpoq puigorsimaneraa Tunumi aamma nunaqqateqaratta? Asii Chemnitz Narup apeqqusiivoq.

Kommuninut allanut sanilliullugu Kommuneqarfik Sermersuumi inuttaasup ataatsip aningaasat atorneqartussat ikinnerpaalissapput, taamaattumik kommunimi kiffartuusinerup ajorseriarnissaa borgermesterip tikkuartorpaa:

- Naatsorsuutigineqarpoq uagut sutigut tamatigut aningaasanik annikinnerusunik kiffartuussisinnaassasugut. Kisianni taamaattoqanngilaq, pitsaassuseq matumani innarlerneqarujussuassaaq. Kiffartuussinitsinni sutigut tamatigut, Asii Chemnitz Narup oqarpoq.

Uani aamma atuaruk: Kommuneqarfik Sermersooq pilliuteqarnerpaasaaq

Naalakkersuisut isumaqatigiissutitut siunnersuutaat akuerineqassappat Kommuneqarfik Sermersuumi sipaarniartariaqalissapput. Asii Chemnitz Narupilli oqaatigaa Kommuneqarfik Sermersooq tassaanngitsoq kisimi Nuuk, aammali nunaqarfeqartoq mikinerusunillu illoqarfeqarluni. Takkualu eqqarsaatigalugit aningaasaatikinnerulernissaq ernummassutigaa. Taamaattumik siunnersuut akuerineqassappat sipaarniarnerit aallartittariaqarput.

- Massakkut ilusissatut nasiunneqartoq akuerineqassappat taava soorunami uagut 56 millionit koruuninik sipaartussanngussaagut. Massakkorpiarlu takorlooruminaappoq sutigut sipaarniartoqassanersoq, taamaallaat oqaatigisinnaavara malunnaatilinnik innuttaasunut tamanut taanna eqquinerluttuussaammat, Asii Chemnitz Narup oqarpoq.

Uani aamma atuaruk: Suliffissarsiortut nalunaarsorneqarnerulissapput

Aningaasaqarnermut Naalakkersuisup, Vittus Qujaukitsup borgermesteri isumaqatiginngilaa, isumaqarami ukiuni kingullerni tallimani ineriartorneq sumiiffimmut ataasiinnarmut sammiveqartoq, tassa Nuuk. Tamannalu Nunatta sinnerani ineriartornermut annertuumik kinguariaataasimasoq, Vittus Qujaakitsoq oqarpoq.

Allannguinissamilu uani Qaasuitsup Kommunia aningaassanik iluanaarnerpaassaaq, taakkuami katillugit 46 million koruuninik pissarsissapput. Qaasuitsup Kommuniata borgmesteriata, Ole Dorphip, siunnersuut tusaannarlugu iluarisimaarpasippaa, itinerusumilli oqaaseqarfigerusunnagu:

- Oqaatsigereerneratuut ukiut arlallit ingerlanerani Nunarput toqujartuinnarsimavoq. Taannalu aaqqinniarlugu massakkut periutsit nutaat eqqunniarneqarput. Isumaqatigiinniarnerit kommuunit Naalakkersuisullu akornanni pisussaapput augustip aqqarngani. Ulloq taanna sioqqullugu oqaatigisinnaanngilara Qaasuitsup Kommuunianinngaaniit qanoq isummerfigineqassanersut, Ole Dorph oqarpoq.