Naliliisartoq: Pisortaaninngortussaq naleqquttuuvoq
Aviisimi Berlingske Buisnessimi suliffeqarfissuarnik allaaserinnittartoq Jens Christian Hansen Mikael Thinghuus pillugu pitsaasorpassuarnik oqaasissaqarpoq.
- Nukissaqarluartuuvoq misilittagartuullunilu. Kamippaliorfik Ecco siumut aallarteqqippaa tassani pisortaaninngortinneqarami.
- Nukilaaffiinik eqqartuissaguma utaqqisinnaannginnini nukilaaffigigaa oqarsinnaavunga, Jens Christian Hansen oqarpoq.
- Paamitsajuitsutut utaqqikatattartutulluunniit oqaatigineqarsinnaanersoq naluara. Royal Greenland eqqarsaatigigaanni, taanna pisortanit pigineqarpoq, taamaanneralu Mikael Thinghuusimut naleqquttuunersoq apeqquserneqarsinnaavoq, pisussalli tamanna takutikkumaarpaa.
Suliffeqarfinni pisortaaffigisarsimasaani, ilaqutariit imaluunniit inuinnaat namminersorlutik pigisaanni, Mikael Thinghuusip sulinermini piginnittut qanimut suleqatigisarpai. Suliffeqarfinnilu taakkunani aalajangiipallattarnerit ulluinnarsiutaapput:
- Suliffeqarfiit inuinnarnik pigineqartut suliffeqarfimmi ilaanik tunisiniarlutik allileriniarlutilluunniit aalajangerunik, tamanna ingerlaannagajak pivusunngortittarpaat. Killormuanilli suliffeqarfinni politikkikkut aqunneqartuni piffissaq sivisuupilussuaq atorneqartarluni, Jens Christian Hansen oqarpoq.
Taamaakkaluartoq Royal Greenland pisortassamik toqqaalluarsimasoq Jens Kristian Hansen isumaqarpoq:
Ikilisaasoqassappat, suliffeqarfiullu iluani pissutsinik sukaterisoqassappat aamma sinneqartoornissaq anguneqarsinnaanngitsoq paasineqassappat, taava Mikael Thinghuus tassaavoq suliffeqarfimmut Royal Greenlanditut ittumut piukkunnartoq. Kisianni politikerinik qanoq pitsaatigisumik suleqateqarsinnaanera naluara, Jens Christian Hansen oqarpoq.
