Naligiissitaanermut Siunnersuisoqatigiit nutaamik siulittaasortaartut

Elisa Petersen Naligiissitaanermut Siunnersuisoqatigiivisa siulittaasussaattut Naalakkersuisut toqqarpaat.
Elisa Petersen
Allattoq Nutaarsiassaqartitsivik / Nyhedsredaktionen
juunip 06-at 2017 14:43

Siunnersuisoqatigiinni siulittaasuujunnaartup Dorthe Korneliussenip nammineerluni tunuarnissani kissaatigimmagu Nunatta Atuagaateqarfiani pisortaasumit Elisa Petersenimit taarserneqartussanngorpoq. 

Elisa Petersen Naligiissitaanermut Siunnersuisoqatigiinni januaarimi 2015-imi ilaasortanngorpoq, 2018-illu naanissaata tungaanut siulittaasuussalluni.

Naligiissitaanermut naalakkersuisup Sara Olsvigip siulittaasortaamik suleqateqarnissani qilanaaraa siulittaasuujunnaartullu suliuniutigisimasai pillugit, ilaatigut inuiaqatigiinni angutit atugarisaasa ukkatarineqarnerat suliniutigisimammagu, qujassuteqarfigalugu.

Naligiissitaanermut Siunnersuisoqatigiinnut siulittaasortaarnerup saniatigut Kathrine Bødker ilaasortassatut aamma toqqarneqarpoq, taamatuttaaq 2018-ip naanissaata tungaanut ilaasortaassalluni.

Naligiissitaanermut Siunnersuisoqatigiit arnat angutillu akornanni naligiissitaanissamik inatsit atuutsinneqarnera nakkutigisassaraat taakkuninngalu paasissutisseerpalaartunik oqallitsitsisassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq