Naligiissitaaneq oqallisaavoq

Nunatsinni ikkussivigitilluni meerartaartarnermut atatillugu oqallisigineqarnerusarpoq arnaqatigiillutik inooqatigiit taamatut naartusinnaatitaassanersut, Danmarkimili qanoq utoqqaatigaluni ikkussivigitilluni meeqqisoqarsinnaanersoq oqallisigineqarpoq.

Inatsit naligiissitaanermut naapertuunnersoq misissorneqartariaqartoq nakorsanit arlalinnit naligiissitaanerlu pillugu oqaaseqartartunit isumaqarfigineqarpoq. Tassami arnap qanoq utoqqaatiginissaa killilerneqarsimavoq, angutilli qanoq utoqqaatiginissaa killilerneqarani.

Danmarkimi arnaq 46-nik ukiulik uialu 33-nik ukiulik ikkussivigitinnikkut kinguaassaqalerusukkaluarpata itigartinneqassapput. Tassami inatsit naapertorlugu arnat 46-leereersimasut ikkussivigitinnikkut kinguaassaqalersinnaanngillat. Nakorsamulluunniit namminersortumut nammineq akilerlugu ikkussivigitissinnaanngillat.

Kisianni angut 60-inik ukiulik nulialu 38-nik ukiulik pisortanit akilerneqartumik ikkussivigitinnikkut kinguaassaqalersinnaapput.

- Isumaqarpunga tamanna immikkoortitsinerusoq, tassami arnat ukiui kisimik killilerneqarput, angutilli ukiui killilerneqaratik, ilisimatooq Erik Ernst oqarpoq.

Erik Ernst nakorsanit arlalinnit politikerinillu taperserneqarpoq.

- Naartumik katatsisinnaaneq innarluutilimmillu meerartaarsinnaaneq arnaq aamma angut utoqqaaneruleriartortillugit ilimanaateqarnerulertarput. Taamaattumik angutit qanoq utoqqaatiginissaannik aamma aalajangersagaqartariaqarpoq, SF-ip naligiissitaanermut oqaaseqartartua Anne-Grethe Holmsgaard aviisimut Kristligt Dagbladimut oqarpoq.

Arnat utoqqaassusiisa killilernerisigut meeqqamut pitsaanerusussaq eqqarsaatigineqartoq oqartoqarpoq.

- Kisianni sooq meeqqamut ajornannginnerussava utoqqarmik ataataqarnissaq utoqqarmik anaanaqarnerminngarnit? Ilisimatooq Erik Ernst aperivoq.