Sumunuku pisut assigiisitsinermut, naligiisitsinermut ataqqeqatigiinnermullu najoqqutat? Taama aperaat nunatta folketingimi ilaasortaatitai Lars-Emil Johansen aamma Kuupik Kleist, tusagassiuutinut allakkaminni.
Taama aperipput, Kalaallit Nunaanni uuliasiornermi isertitaasalerumaartussat agguarneqartarnissaat kalaallit danskillu Namminersorneq pillugu isumalioqatigiissitaasa suleqatigiissitaliaanni aningaasaqarnermut inuutissarsiornikkullu ineriartortitsinermut tunngasunik suliaqartup suna isumaqatigiinngissutigineraat ilisimaneqalereersorlu.
Danskit siunnersuutigaat, kalaallit uuliasiornermut tunngatillugu selskabiliussagaluarpata, Danmarki isertitat ilaannik pisariaqartoq. Kalaallilli tamanna naligiimmik suleqatigiinnissamik marsimi isumaqatigiissummik sumiginnaanerusoraat, Kalaallit Nunaat ullumikkut danskit uuliasiorfiata DONG-ip isertitaanit suallanneqarneq ajorpoq.
DONG-ilu uuliamik qalluileraluaruni akileraarutit peereerlugit iluanaarutigisartagassai tamakkiisumik Danmark-imit iluanaarutigineqartassapput.
Uuliamik iluarnaarutit siunissami ukiumi pineqartumi aatsitassarsiornikkut isertitat 75 mio.kr. sinnersimagaangatigit taakkua affaat ataatsimoortumik tapiissutinit annikilliliissutaasassasut, isumaqatigiissutaareeraluarpoq.
Suleqatigiissitaliaq tullianik oktobarip ulluisa pingajuanni ataatsimiissaaq.
