Nakuuserneq qulequtaralugu ataatsimeersuartitsisoqalerpoq
”Nakuuserneq aqqutissaanngilaq” qulequtaralugu Ilaqutariinnermut Peqqissutsimullu Naalakkersuisoqarfik nakuuserneq pillugu ataatsimeersuartitsinialerpoq.
Allattoq Lotte Holm
februaarip 20-at 2009 11:56
Angerlarsimaffinni nakuusertarneq, arnanut meeqqanullu nakuusertarneq, aapparisamullu nakuusertarneq ataatsimeersuarnermi annertunerusumik sammineqassapput.
Ataatsimeersuarnissap siunertaasa ilagaat suliniutit assigiinngitsut ataatsimeersuartunit ilisimasaqarfigineqarnerulernissaat, ilisimasanillu misilittakkanik suleriaatsinillu avitseqatigiinnissaq.
- Nakuusernermik attuumassuteqartunik suliaqartut namminerlu piumassusertik naapertorlugu suleqataasut ataatsimeersuarnerup ataatsimoortinniarpai, ajornartorsiut pillugu annertunerusumik ilisimasaqalernissaq ataatsimoorlunilu ataqatigiissakkamik annertuumik suliniuteqarsinnaanngornissaq taamaaliornikkut anguniarneqassalluni, Ilaqutariinnermut Peqqissutsimullu naalakkersuisoqarfik allappoq.
