Nakuuserneq aserorterinerlu pillugit nalunaarutiginnittukinnerusoq – kinguaassiuutinut pinerluutit amerlisut
Pitsaasortai aallartissutigisigit: Nakuusernerit, tillinniarnerit aserorterinerillu pillugit politiinut siorna nalunaarutigineqartut ukiup siulianut sanilliullugit ikinnerupput.
Politiinummi pinerluttuliornermik inatsimmik unioqqutitsinerit pillugit siorna nalunaarutigineqartut 2023-mit 574-inik ikinnerupput. Tamanna Kalaallit Nunaanni Politiit Ukiumoortumik Nalunaarutaanni ukiut tamaasa marsimi saqqummersinneqartartumi allassimavoq.
Tillinniarnerit aserorterinerillu pingaartumik ikiliartortut nalunaarusiami kisitsisit takutippaat: Taama pinerluuteqarnerit nalunaarutigineqartut ukiuni 20-ni aatsaat taama ikitsigisut, Kalaallit Nunaanni Politiit nalunaarutigaat.
Nakuuserit pillugit nalunaarutigineqartut ukiuni tallimani aatsaat taama ikitsigipput. Taamaakkaluartorli nakuuserit politiinut nalunaarutigineqartut suli amerlangaatsiarput: Nakuuserit politiinut siorna nalunaarutigineqartut 948-pput.
Pingaartumik sapaatit akunnerisa naanerini tassa arfininngornerup sapaatillu unnuaani nakuusernerit nalunaarutigineqartut amerlanerpaasarput.
Kalaallit Nunaanni Politiit ukiumoortumik nalunaarusiaminni pisarnertut sanilliussineranni pillaasarnermut inatsimmik unioqqutitsinerit kisitsisaat naalagaaffeqatigiit sinnerini kisitsisinut sanilliullugit qaffasipput:
Kinguaassiutitigut pinerluuteqarnerit nalunaarutigineqartut amerlisut
Kinguaassiuutitigut pinerluuteqarnerit suli amerlavallaarput: 2024-mi nalunaarutigineqartut ukiup siulianut sanilliullugit 22-nik amerlanerupput.
Tamannali annerusumik assiliartalerlugu isiginiarneqassaaq, siornami nalunaarutigineqartut ukiuni tallimani nalunaarutigineqarsimasuni ikinnerpaapput.
Meeqqanulli kinguaassiuutitigut atornerluinerit pillugit suliat ikilisimapput. 2023-mi meeqqanut pinngitsaaliilluni atornerluinerit, meeqqamik 15-it inorlugit ukiulimmik kinguaassiuutitigut atoqateqarnerit aamma meeqqanut kannguttaatsuliornerit pillugit nalunaarutigineqartut 249-pput. Kisitsit taanna 2024-mi 193-inut apparpoq.
- Naak tamanna ajunngitsumik takussutissiigaluartoq, nalunaarutiginnittarnerit amerlassusaat suli qaffasittorujussuuvoq, taamaammallu pingaaruteqartorujussuuvoq, politiit paasinnittaasiat malillugu, inuiaqatigiit ataatsimut isigalugu meeqqat kannguttaatsuliorfigineqartarnerisa akiorneqarnerata attatiinnarnissaata ukkatariinnarnissaa, politiit pisortaat, Bjørn Tegner Bay oqarpoq.
Nunatsinni kinguaassiuutitigut pinerluuteqarnerit Danmarkimi Savalimmiunilu kisitsisinut sanilliunnerat uani takusinnaavatit.
Suliani allani marlunni aamma qaffariartoqartoq politiit aamma erseqqissaatigaat. Tassa inuusuttut pinerluuteqarnerat aamma imminut toqunneq.
- 2022-mi aammalu 2023-mi inuusuttut pinerluttarneri ukiut siuliini appariaateqarsimagaluartut, 2024-mi amerleriarsimapput, 2020-mi aammalu 2021-milu amerlassutsit qaffaseqatigalugit. Aammattaaq imminut toquttut 2024-mi amerlassusaat, 47-sut, ukiut siuliini amerlassutsinit qaffasinnerupput, 2016-imullu utissaagut imminut toquttut nalunaarsorneqartut taamak amerlatigisut nassaariniarlugit, Kalaallit Nunaanni Politiit nalunaarput.
