Nakuusap meeqqat tunissuteqarfigai

Tunissutissaq tassaavoq erinarsuut nipilersoqatigiit Nanook aamma Nakuusap Meeqqanut Isummersorfiisa, Ilulissani ukiaq "meeqqat ilinniarnissamut pisinnaatitaaffeqarnerat" qulequtaralugu ataatsimeersuartoqarnerani taalliaat. Ataatsimeersuartoqarnerani peqataasut taamani aviisiliorput, radiuliorlutik tv-liorlutillu.

Tassalu aamma erinarsuusiorput taannalu maanna tamanut tunissutissatut saqqummersinneqarpoq. Erinarsuut "Ullorissat isigaakka" kaammattuinermik ataatsimoorlunilu siunissamut pitsaanerusumut sanarfeqatigiinnissamut kissaateqartumik taallartaqarpoq.

Erinaa qatanngutigiit Frederik aamma Christian Elsnerikkut suliaraat ukiullu ingerlanerani immiussimallugu. Erinarsuullu unammillernarsimaqisoq Christian Elsnerip oqaatigaa.

- Unammillernaqaaq assut, kisianni aamma assorsuaq nuannerluni pilluarnarlunilu taamatut meeqqanut tunniussisinnaalluni, Christian Elsner tusagassiorfinnut nalunaarummi oqarpoq.

Taassuma ilanngullugu oqaatigaa Tupaarnaq Mathiassenip ikiortitut peqataanera iluaqutigilluarsimagitsik. Erinarsuut "ullorissat isigaakka" Katuami ullumi tallimanngornermi siullerpaamik tusarnaartitsissutigineqassaaq, Christian Elsnerilu, Tupaarnaq Mathiassen meeqqallu Nakuusameersut erinarsortuussapput.

Nunatsinni sumiiffinni allanit aamma malinnaasoqarsinnaavoq, Nakuusa facebookimi quppernermini aaqqissuussamit toqqaannartumit aallakaatitsissammat.