Nakorsiartarfimmi peqqissaasoq: Julefrokostimi mianersorlusi
Juulleriartornerani ajoqusernerit nakorsiartarfimmi suliarineqartartut tassaanerupput, imigassartorpallaarnerup kingunerisaanik ajoqusernerit, Nuummi nakorsiartarfimmi peqqissaasoq Apollonie Møller oqarpoq.
Julefrokosternerni imigissartortoqarsimatillugu suleqatigiit sapiillisaaqatigiissinnaasarput unammillutillu, tamatumalu kingunerisaanik ajoqusertarlutik. Ilaqarput imigassartorpallaarsimallutik imminnut kamaattunik, ajoquserlutillu, ilai nissuminnik napisoortarput, tamakkuuneruppullu nakorsiartarfimmi ulapputigineqartartut.
Suleqatigiit julefrokosterneranni ilaqartarput, imigassartorpiarneq ajorlutik annertuumik imigassartortartunik, taakkualu silaaruttarput nukillaarlutillu, tamannalu ulorianarsinnaavoq, peqqissaasoq Apollonie Møller oqarpoq. Imigassartorpallaannginnissaq kajumissaarutigineqarpoq, soorlu akunnermut immiaaqqat marluk imermik imertortarluni, taamaalilluni aalakoorpallaannginnissaq anguniarsinnaavaat nuannaarneq sivisunerussammat, julefrokosternerlu nuannersumik eqqaamaneqarsinnaaqqullugu.
