Nakorsat: Tarnit nakorsaattut taaguut inatsisitigut illersorneqartariaqarpoq
- Tarnit nakorsaattut imminut taagorsinnaanerup illersorneqartariaqarnera tunngaviusumik pingaaruteqarpoq, taama oqarpoq Roal Ulrichsen Danmarkimi tarnit nakorsaasa kattuffianni siulittaasoq.
- Katsorsaaniartup suliassaminut tunngasunik ilinniarluarsimanissaa inuit nappaatillit qularisusaanngilaat. Katsorsartissimanerlu ajorigaanni katsorsarneqarnerlussimasut maalaartarfiannut maalaaruteqartoqarsinnaavoq.
- Danmarkimi ilinniarsimanngitsut katsorsaariaraluarnerisa kingunipiluinik takusareerpugut. Ilaatigut allaat napparsimasut ilinniarsimanngitsunit katsorsarnerlunneqarsimasut pinngitsaalisaallutik napparsimavinnut unitsinneqartariaqartarput, ilaallu allaat imminnut toqoriartarlutik.
Roal Ulrichsen, ukiut arlallit matuma siorna Kalaallit Nunaanneereerpoq, taamanilu, Hans Enoksenimut tarnit nakorsaattut taaguutip illersorneqarnissaa anguniarlugu inatsisiliornissaq kaammattuutigisimagaluarlugu.
-Naatsorsuutigisariaqarparpummi Kalaallit Nunaanni pisortat, soorlu qallunaat pisortaat taamaattut; innuttamik toqqissisimanartumik passunneqarnissaat isumagerusussagaat, Roal Ulrichsen naggasiivoq.