Nakorsat taarseraannerat akornutaavoq

Peqqinnissaqarfimmi nakorsanik amigaateqarneq pissutaalluni nakorsatut atorfiit katillugit 90-it missaanniittut affaat sinnerlugit nakorsanit piffissami sivikinnerusumi paarlatsinik atorfigineqarput.

Tamanna innuttaasunik sullissinermut killilersuisartoq, peqqinnissaqarfimmi Peqqissutsimut Naalakkersuisoqarfimmi pisortaq, Anne Birkekær Kjeldsen oqarpoq.

- Nakorsanik ilinniarsimasunik naammattunik peqanngilagut, taamaattumillu nunanit allaniit suliartortut pinngitsoorsinnaanatigit. Nalunngilara peqqinnissaqarfimmi aqutsisut sulisullu sapinngisanngisaminnik nakorsanik atorfinitsitsiniarlutik suliniuteqartut aammalu kissaatigisaatigineqartarpoq atorfinitsinneqartut sivikinnerpaamik qaammatini pingasuni sulisorineqartarnissaat. Ilaannikkulli tamanna pisinnaaneq ajorpoq. Taamaattoqartillugu akueriinnartariaqartarpoq nakorsat qaammammi ataatsimi marlunniluunniit sulinissaat, tamannali innuttaasunut ajoqutaasinnaavoq, Anne Birkekær Kjeldsen oqarpoq.

Nakorsat sivisunerusumik sulisorinissaat ajornakkusoortarpoq, peqqinnissaqarfimmilu sulisut nakorsanik paarlatsinik sivikitsuinnarmik atorfilinnik piffissaq sivisooq atorlugu ilinniartitsisarlutik.

- Peqqinnissaqarfimmi sulisut affaasa missaat akulikitsuararsuarmik paallakaattarput. Tamanna suliaavoq angisoorujussuaq, tassami inuit ilisaritinneqartarput kalaallilu Nunaanni nakorsatut sulinerup qanoq ittuuneranik ilisaritinneqartarlutik. Nakorsallu suliaminnut sungiussisimalerlutillu aallartarput, Anne Birkekær Kjeldsen oqarpoq.

Nakorsanngorniaq Lars Pavia Mølgaard Århus Universitetimi ilinniarluni ukioq manna aallartittoq, isumaqarpoq nakorsanik paarlatsinik atuineq annertuallaartoq.

- Napparsimaveqarfinni nakorsanik paarlatsinik atuineq annertuallaaqaaq nakorsanillu amerlanerusunik atorfinitsitsisoqartariaqarpoq. Aalajangeqqavunga ilinniakkannik naammasiguma Kalaallit Nunaannut uterniarlunga uanullu pingaartorujussuuvoq aalajangersimasumik atorfinnissaq, Lars Pavia Mølgaard oqarpoq.

Kalaallit nakorsanngorniat Danmarkimi ilinniartut ullumikkut 30-t missaanniipput.