Nakorsat iliuuseqaqqusipput
- Ammassalimmi inuit 1.850-it ukiut 45-t matuma siornagut misissorneqarsimanerannit paasissutissat sukumiisumik misissoreerlugit qulakkeerlugu oqarsinnaanngorpugut, kalaallit akornanni uummallulerneq atugaaleraluttuinnarsimasoq, taama oqarpoq Stig Andersen, Aalborgmi Kalaallit Nunaannut tunngasuni ilisimatusarfimmi nakorsaanerusoq.
Stig Andersenip nakorsat nunatsinneersut peqatigalugit Ammassalimmi innuttasunik misissuinerit ukiut qulit matuma siornagut misissoqqissaalerpaat, saniatigullu ullumikkut kalaallit nappaatit atugaat misissuiffigalugit. Paasisat atugassiami Atherosclerosis-imi saqqummiunneqaqqammerput.
- Maluginiarparput ukiuni kingullerni uummatimikkut nappaatillit amerliartuinnartut, tassa taqqat qerattartoornerisa nappaatit pilersitaat, soorlu taqqatigut milittoortarnerit siumugassaalersimallutik, Stig Andersen oqarpoq.
-Ammassalimmi ukiut 45-it matuma siornagut misissukkat soqutiginarluinnarput. Taamanikkut kalaallit qangatuulli inuupput. Innuttaasullu tamarluinnangajammik, tassa 97 procentii peqataasimasut pillugit misissukkavut soqutiginarluinnarput, oqarpoq.
1962-imiit 64-imut misissukkat takutippaat innuttaasut timitik aalatinnerusarneraat kalaaliminiinnangajannillu inuussuteqarsimasut.
- Taamaammat uummallunnerit taamanikkut qaqutigoorluinnarsimapput, soorlu sukkornerit, aap naqitsineranik qaffattoornerit taqqatigullu milittooqqajaanerit ullutsinni nalinginnaalersimallutik, Stig Andersen erseqqissaavoq.
Nakorsat misissueqataasut iliuuseqaqqusipput.
- Kalaallit Nunaanni innuttaasut peqqinnanngitsunik nerisaqarnermikkut timiminnillu aalatitsinngippallaarnermikkut puallaraluttuinnarput. Nappaatit amerliartuinnassanngippata inooriaatsip allanngortinnissaa suliniutigisariaqalerpoq, nakorsat suleqataasut ilaat Nuummi nakorsiartarfimmi nakorsaaneq Gert Mulvad taama oqarpoq.
