Nakorsassaaleqineq pissutaalluni nakorsat suliassaqarpallaarput
- Tamatuma kinguneraa nakorsat suliassaqarpallaalernerat. Soorlu ippassaaniinnaq nakorsiartarfimmut nukingernartumik katsorsartinniartut 115-it ornigussimapput, taama oqarpoq Kent Kleinschmidt, Nakorsiartarfiup nakorsaanera.
Nakorsiarniarlutik inniminniisimasut sapaatip akunnerini pingasuni sisamaniluunniit utaqqisariaqartarnerat pillugu, Kent Kleinschmidt ima nassuiaavoq.
-Ukioq ataaseq matuma siorna imatut ingerlanikuuvoq, tamatigut sapaatip akunnera ataaseq tikikkaangatsigu taava nakorsiarsinnaaneq matusarparput, taamaattumillu nakorsiarniarlutik sianeraluartut oqarfigitiinnartarput, ”piffissat nungoreerput aqagu ooqattaarlugu sianerniarna”. Isumaqaratta tanna tulluarunnaarnikuusoq, ullumikkummi akuerineqarsinnaanngilaq taamatut sulissussineq, taama oqarpoq Kent Kleinschmidt, nangipporlu.
-Periarfissat pitsanngortinniarlugit qammat ataaseq siumut inniminniisinnaanngorlugit ammaannikuuvagut. Kisianni tamassuma kingunera takusinnaavarput allanngorteqqissanerlugulu eqqarsaatigisariaqassallugu.
Sinerissami nakorsat ukiuni arlaqartuni amigaataanikuusut aamma Nuummut anngussimasut Kent Kleinschmidt-p oqaatigaa.
-Ukua, qallunaatut taaneqartartut praktiserende læge-t, ilaqutariit nakorsaat aamma qallunaat nunnaanni ikiliartoramik, tamaattumik tikittartut ikiliartornerat aamma Nuummut sunniukkami.
Ukiut 20-t missaanni nakorsat Nuummi sulereersimasut, ukiuni makkunani soraartussanngorput taakkualu aamma taartissaqanngitsut Kent Kleinschmidt oqarpoq.
-Taamaasilluta massakkut quliusussaagaluarpugut, taavalu nakorsanik inuusuttunik ilinniartitaqarluta. Kisianni piviusut allaapput, ullumikkut 7 –innaavugut ilinniartullu marluk. Taava takkua utoqqaat eqqarsaatigilerpaat, taamatut ingerlaannavissinnanerlutik imalunniit pensionernissartik siusinaarlugu tiguinnassanerlugu, taama oqarpoq Kent Kleinschmidt Droning Indrid-p Napparsimmaviata nakorsiartarfiani nakorsaaneq.
Nakorsat eqqartorneqartut ungasinngitukkut soraarninngorpata, nakorsiartarfimmi nakorsat 3-niit 5-nut ikilisapput.
Aamma Nuummi nakorsanut inigitinneqartartut nakorsanit naammagittaalliutigineqartarput nakorsallu inuusunnerusut Meeqqat Atuarfiisa meeqqaminnut tunniussinnaasai pitsaanngippallaaneri aamma naammagittaalliutigisaraat Kent Kleinschmidt-mit oqaatigineqarpoq.
