Nakorsaq Århusimi universitetimut

Nuummi Dronning Ingridip napparsimaviani nakorsaq Henning Sloth Pedersen, Århusip universitetiani inuit peqqinnissaat pillugu sammisaqarfiusumi lektoritut atorfinitsinneqarpoq.

Taama Henning Sloth Pedersenip atorfinitsinneqarneranut siunertaavoq, nakorsaatit pillugit ilinniartut atuartittalissammagit, atuartitsinerillu taakku sullivinni avatangiisinut nakorsaatinullu nunatsinnut attuumassuteqartunik imaqartinneqartassasut, nunatsinni suliffigissaasut nalunaarutigaat.

- Universitetimi institutti Kalaallit Nunaanni sullivinni avatangiisit nakorsaateqarnerlu pillugit assut soqutiginnittuupput, peqqutiginerullugu tamakkununnga tunngasut suli ilisimatusarfigineqarnikoorpiannginnerat, taama Henning Sloth Pedersen oqarpoq.

- Danmarkimut nunarput sanilliullugu silaannaq panertorujussuuvoq, tamannalu sumiiffinni arlalinni innaallagiaqarnerulersitsisarpoq.

- Taamaammat soqutiginarpoq, misissuivigissallugu nillertumi taartumilu sulinerup inuit qanoq sunnertarnerai, Henning Sloth Pedersen oqarpoq.

Nangipporlu:

- Assersuutigalugu nunatsinni aalisakkerivinni sulinermi avatangiisit misissorusuttorujussuuagut, tamakkumi misissuivigineqarnikuunngisaannarput. Henning Sloth Pedersen oqarpoq.

Taassuma Århusip universitetiani atorfinitsinneqaraluarluni nunarput qimassanngilaa, Henning Sloth Pedersen nunatsinniiginnassaaq Nuummilu nakorsatut sulinini ingerlatiinnassavaa. Pilersaarutaavorli, ukiumut ataasiarluni Århusip universitetianut atuartitsiartortarnissaa.