Nakorsaq siulleq Kalaallit Nunaannut angerlarpoq
Taanna tassaavoq Sisimiuneersoq, 31-nik ukiulik, Finnur Eldevig, Danmarkimi 1999-imili ilinnialersimasoq. Dronning Ingridip Napparsimmavissuani Nuummiittumi nakorsaatit atorlugit katsorsaaviup immikkoortortaqarfiani aggustip aallaqaataaniit sulilissaaq.
Ukiorpassuarni Danmarkimiissimagaluarlunga nunarput perorfigalugu nunagisatut isigiuarpara, meeqqattalu nunatsinni peroriartornissaat aamma kissaatigaara, tamatumalu saniatigut nakorsamut inuusuttumut nunarput suliffigissallugu sorpassuartigullu ilinniarfigissallugu pitsaasutut isigalugu, sorpassuillu aamma pisooqataapput piaartumik nunatsinnut uterusunninnut.
Radioa Aviisimiit aperineqarami qanorpiaq sorpassuartigut nunatsinni misilittagaqalersinnaanerminik akivoq:
Soorlu Danmarki immikkut ilisimasaqartut immikkoortortaqarfianniinniaraanni, ukiup affaannaani nutaanerusunik misileraasinnaavutit.
Maanili Kalaallit Nunaanni sorpassuarnik misileraaneq ingerlassinnaavara, pissutigalugu maani napparsimmaviup tunngavimmigut aallaavigimmagu,
Taamaattumillu Danmarkimi nakorsanngoqatinniit sorpassuartigut Kalaallit Nunaanni misilittagaqarnerusinnaallunga, ilikkagaqarnerunissannullu periarfissaqarnerullunga.
-Sorpassuartigut Kalaallit Nunaanni ilinniagaqarnerusinnaanerit assersuusiorfigilaarsinnaaviuk?, aperaarput, imalu akivoq:
Meeqqat inersimasullu nakorsaaffiginissaannut periarfissaqarpunga, tamatuma saniatigut uummalluttut, puammikkut napparsimasut, sukkortut aammalu kræfteqartut katsorsarnissaannut periarfissaqassaanga.
Taamaalillunga katersaariaatsit assigiinngitsorpassuit malinnaaffigalugit ilinniagaqarfigisinnaanerussavakka, Finnur Eldevig oqarpoq.
- Sooruna Danmarkimi nakorsaatinut tunngasunik ilinniagalippassuit Kalaallit Nunaanni sulerusunnerusut? Akivoq:
Ukioq manna atuarnerma nalaani aamma arsaattarpugut timersuutinillu assigiinngitsunik ingerlataqartarluta, immitsinnullu ataqatigiittorujussuuvugut, ilaannilu Aarhusimi Kalaallit Illuataanni ataatsimeeqatigiittarluta immitsinnullu qiimmassaqatigiittarluta, taamaalillutalu Nunatsinnut uternissarput eqqartortarparput, pingaartumik ilaqutariinnguanut meerartalinnut Kalaallit Nunaanni sulilluni misiliinissaq unamminartuusimavoq, nakorsanngorlaaq naggasiivoq.
Finnur Eldevig nakorsaatinik katsorsaavimmeereeruni pilattaavimmi ilinniagaqarnissi ingerlatsissavaa, tassaneereeruni nakorsiartarfimmi sulissalluni.
Siunissami naatsorsuutigaa sinerissami illoqarfiit ilaanni nakorsanngorumaarnissani. Nakorsanngorniartunit 22-usunit nakorsatut sulilersussat tulliit pingasut ukiortaami nunatsinnut tikissapput.
