Nakorsaq pillagaasimanerminik isertuussisimanngilaq
- Kalaallit Nunaannut pigama pillagaasimanera isertuutinngilara aamma pisimasut misissuiffigisinnaagaat atsiornikkut akueraara. Kalaallit Nunaanni sulinera nuannaraara, napparsimmavimmilu sullitama suliartoqqinnissannik aalajangersimasumillu atorfininnissannik kajumissaarpaannga. Taama oqarpoq nakorsaq 56-inik ukiulik - ajornartorsiutitaqanngitsumik meeqqanut inersimasunullu nakorsatut atorfinitsinneqartoq, naak meeqqamik kinguaassiuutitigut atornerluisimasutut eqqartuussaalluni ukioq ataaseq parnaarussaanini aasaq kingulleq naammasseqqammeraluaraa, aviisimi Ekstra Blademi taama allaaserinnittoqarpoq.
- Nakorsaq qaammatini pingasuni taartaalluni Paamiut napparsimmavianni peqqissaaveqarfimmi nakorsatut atorfeqarpoq. Atorfeqarnerminik sivitsuiniarluni qinnuteqarmat itigartipparput. Tassami piffissap ingerlanerani inuunerani pisimasut paasisaqarfigigatsigik, Nunatsinni peqqinnissamik isumaginnittoqarfimmi atorfilinnut qullersaq Mogens Bentsen oqarpoq.
Mogens Bentsenip erseqqissarpaa, Paamiuni ukiukitsunik inersimasunilluunniit naapertuilluanngitsuliortoqarsimaneranik nalunaaruteqartoqanngimmat.
Nakorsap 56-inik ukiullip meeqqamik atornerluisimanini miserratigaa, aamma illoqarfiup eqqartuussiviani Østre Landsretimilu 2008-mi Næstvedimi eqqaamiuminik niviarsiaqqamik ukiuni tallimani kinguaassiuutitigut atornerluisimasutut eqqartuunneqarami pinngitsuunerarpoq.
