Nakorsaaneqarfik: Arsakut inuit ulorianartorsiortinngilaat
Islandimi qaqqap innermik anitsinerata kinguneranik inuit ulorianartorsiortinneqanngillat. Kalaallit Nunaata nakorsaaneqarfianit tusagassiutinut nalunaarummi taama allassimavoq.
Allattoq Apollo Jeremiassen
- Islandimiit arsakut sananeqaataasa mikinertaat annikitsuararsuit maanga nunamut nakkaanissaat ilimanarneruvoq, Nakorsaaneqarfik pisumut malinnaalluartoq paasissutissiivoq.
Arsakunit nuissernerit inunnut ulorianaateqannginnerat Danamarkip Avatangiisit pillugit misissueqqissaartarfianit aamma erseqqissaatigineqarpoq.
- Arsakut inuit peqqissusaannut akornusiinavianngitsoq ilimagaarput, ilisimatooq Ole Hertel tusagassaqartitsivimmut Ritzau-rimut oqarpoq.