Nakorsaaneq: Nualluut H1N1 Nunatsinnut annguteriaannaavoq
Inuit nappaammit ulorianartorsiornerusut nakorsanit akiuussutissalersorneqaraluartut, kikkut tamarmik tunillatsereersimasinnaasut akiuussutissalersornissaasa angumerinissaat ajornavippoq. Nappaatip tunillaassuunnera sapaatip akunnerinit arfineq-pingasuniit aqqaneq-marlunnut sivisutigisarpoq, tunillatsissimasullu affaat sapaatip akunnerisa pingasut ingerlaneranni tunillatsissimassallutik.
Taamaakkaluartorli akiuussutissinneqarnissaq pinngitsoortariaqanngilaq, sapaatip akunnerani uani tullianiluunniit akiuussutissalerneqartussaagaanni, Niels Strandberg erseqqissaavoq.
- Illersorsinnaasatta affaat sinnerlugit tunillaassuuttumik nappaalanerup qaangiutinnginnerani angumerisinnaavavut, taama oqarpoq, Statens Seruminstituttimi pisortaq, Kaj Selikken.
Kalaallit Nunaat nualluummit H1N1-imit siullermik eqqugaanngikkallarpoq, nakorsaanerulli Flemming Stenzip naatsorsuutigaa nualluut sukkulluunniit takkussinnaasoq.
- Soorunami takkutissaaq. Nappaatimmi tunillannartua nunani eqqatsinniittuniippoq aammalu Danmarkimut Danmarkimiillu angallattoqartorujussuusarluta.
Kalaallit siulliit akiuussutissalersornerat aallarteruttorpoq. Tamatumani napparsimasut nappaammik tunillatsinnissaminnut ulorianartorsiornerusut pineqarput, tassalu inuit timimikkut akiuussutissaqannginnerusut aamma peqqinnissaqarfinni sulisut.
Nakorsaanerup inuit timimikkut akiuussutissaqannginnerusut nakorsiaqqullugit akiuussutissalerseqqullugillu inappai. Innuttaasut peqqikkaluarlutik nualluutip ersiutaanik peqalersimasut siniffimmiiginnartariaqarput. Ullut tallimat qaangiunnerisigut ersiutit suli taakku pigigunikkik nakorsaq attavigisinnaavaat, nakorsaaneq oqarpoq.
