Nakorsaaneq coronamik tunillatsissimasoq
Nunatta nakorsaanera, Henrik L. Hansen coronamik tunillatsippoq.
Sermitsiaq.AG nakorsaanerup tunillatsissimasup mailikkut nammineertumik akisartuanik maluginnilersimasoq taama allaaerisaqarpoq
Nakorsaanerup – tunillatsissimasorpassuit allat assigalugit – coronamik tunillatsissimalluni mailimi nammineerluni akisartumi paasissutissiissutigaa.
Tamannalu tupaallaatiginngilaa.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Inuit coronamik napparsimarululersinnaasut aamma angalasussat coronapasimik atuisussat misissortissinnaapput.
Allat sinneri angerlarsimaffimminni imminnut misissorsinnaapput aamma/ imaluunniit peqqisseqqinnissartik utaqqissavaat.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu januaaripo ulluisa 25-ata tungaanut unnukkut quliniit ullaakkut tallimat tungaanut matoqqasassapput.
- Nunatta inuisa amerlanersaat tunillanneqarumaartut oqaatigereernikuuara. Taamaammat uanga aamma eqqugaanera tupannartuunngilaq. Pissutsit taamaakkaluartut ajunngilanga, ullualuillu qaangiuppata suleqqilersinnaassallunga natsorsuutigaara, Henrik L. Hansen Sermitsiaq AG-mut oqarpoq.
Taassuma misisortinnissamut maleruagassat nutaat malikkamigit PCR-imik misissortissimanani erseqqissaatigaa.
Tassunga taarsiullugu nammineq imminut misissuutit assigiinngitsuniit pingasuneersut atorlugit misissorsimavoq.
Nakorsaanerup misissueriaaseq nutaat pillugu ippassaq tusagassiortunik katersortitsinermi saqqummiivoq.
Naalakkersuisut siulittaasuat, Múte B. Egede coronamik maanna aamma tunillatsissimavoq. Amerlangaatsiartullumi tunillatsissimapput.
Tunillatsissimasut nutaat 479-it ippassaq paasineqarput, taakkuli misissueriaaseq nutaaq eqqarsaatigalugu isigineqassapput.
Napparsimarulersut angalasussallu coronapasimik takutitsisussat kisimik PCR-imik misissortissinnaapput. Allat sinneri angerlarsimaffimminni imminnut misissorsinnaapput aamma/ imaluunniit peqqisseqqinnissartik utaqqissavaat.
Tassa imaappoq coronamik tunillatsissimasut peqqinnissaqarfimmut nalunaarutigineqanngitsut amerlapput. Nunatsinni coronamik tunillatsissimasut ataatsimut amerlassusaat misissueriaaseq nutaaq pissutigalugu saqqummiunneqartarunnaarput.
