Nakkutilliiviliorput
Danmarkimi Sjællandip kujataani tigutsisilik timmissat nappaataanik toqquteqarsimasoq nanineqarmat, maannakkut Næstvedip Farumbrollu akornanni oqartussat nakkutilliiviliorput.
- Timmissat nappaataat timmissat nujuartat avannamukaarneri malillugit Europa atuarlugu Danmarkimut anngunnissaa tamatta ilimagisimavarput, ilaqutariinnermut atuisartoqarnermullu ministeri Lars Barfoed ullumi tusagassiortunik katersortitsinermini taama oqarpoq.
Tigutsisilik sapaatip akunnerata kingulliup naanerani toqungasoq nassaarineqarpoq misissuinermilu paasineqarpoq timmissat nappaataanik toqquteqarsimasoq.
Timmissat aallartartut Svineømi qasuersaartarmata kiisalu timmissat assigiinngitsut tassani piaqqiortarmata tigutsisillip Svineømi nassaarineqarnera immikkut ilisimasalinnit tupaallaatigineqanngilaq.
Næstvedip Farumbrollu akornanni oqartussat ullumi nakkutilliiviliorput, inuussutissaqarnermut aqutsisoqarfimmit taama nalunaaruteqartoqarpoq.
- Timmissat nappaataannik tunillaassuisut sapinngisarput naapertorlugu killilersimaarniarsarissavarput, inuussutissaqarnermut aqutsisoqarfimmi uumasunik nakkutilliisoq Preben Villybær taama oqarpoq.
Nakkutilliiffimmiittut timmissat tamarmik silamut anniseqqusaanngillat, timmissallu toqungasut uumasulluunniit nakkutilliiffimmit anniseqqusaanngillat.
Timmissat nappaataat ukiut arlallit matuma siorna Kangiani naammattoorneqarpoq. Inuit tappavani aamma timmissat nappaataanik tunillatsittarput, maannamullu inuit 100-t toqqutigereerpaat. Timmissat nappaataata inunnut tuniluutilernissaa annilaagatigineqarpoq. Taamaalissappat inuit sukkasuumik toqoralissapput.
