Nakkutilliisoq akilertilluni eqqussisimavoq
Immikkoortumi isumannaallisakkami tigummineqaraanni sulilu eqqartuussaatinnani, qanorluunniit iliorluni avammut attaveqartoqaqqusaanngilaq. Taamaattorli 33-nik ukiullip pineqaatissinneqarsimasunut inissiisarfimmi nakkutilliisoq 200 koruuninik akilerlugu mobiltelefonimik isertortumik eqqussisimavoq.
Isertortumik eqqussineq nakkutilliisumut qanoq kinguneqassanersoq politiit maannakkorpiaq oqaatigisinnaanngilaat.
- Mobiltelefoni isertortumik eqqunneqartoq pillugu suliassaq suli misissorneqarpoq, taamaattumillu suliaq annertunerusumik oqaaseqarfigisinnaanngilarput, Bjørn Bjerregaard ikiaroornartulerisuneersoq oqarpoq.
Mobiltelefoni isertortumik eqqunneqartoq pillugu suliassaq hashimik suliassamut annertoqisumut, maannakkorpiaq Nuup Eqqartuussiviani suliarineqartumut, atatillugu saqqummerpoq.
Tamatumani angut 33-nik ukiulik Nuummeersoq angullu 28-nik ukiulik Danmarkimeersoq tamarmik hashimik 15 kiilumik fjernsynimi toqqukkamik eqqusseriarsimasutut pasineqarput.
Nuup Eqqartuussiviani ualeru suliassaq pillugu eqqartuussisoqassaaq.
