Najugarisaq qimannagu perorsaasutut ilinniarneq soqutigineqarluarpoq
Perorsaanermik ilinniarfimmik illoqarfimmi allami, soorlu Nuummi pilersitsisoqarsinnaava?
- Ullormiit ullormut ilinniarfimmik aallartitsisoqarsinnaanngilaq, aningaasartuutit eqqarsaatigalugit. Perorsaanermut Ilinniarfik Ilulissaniittoq maannakkut allilerneqarpoq angissutsiminit marloriaammik ilaneqartussaalluni, tamatumalu kingunerissavaa ilinniartunik ilinniartoqatigiinnik ukiumut ataatsimik aallartitsisoqartaraluartoq ilinniartoqatigiit marluk nutaat aallartittalissapput Nuka Kleemann oqarpoq.
Kalaallit Nunaanni perorsaasut ilinniarsimasut 300-it sinneqartut amigaatigineqarput, kisitsisillu ullumikkut takussutissat aallaavigalugit Nuka Kleemannip eqqoriarpaa ukiut qulit sinnerlugit qaangiuppata Nunatsinni perorsaasutut ilinniarsimasut pigineqalerumaartut.
Najugarisaq qimannagu perorsaasutut 2007-imi ilinniartut 18-it Nuummi naammassipput, ukiorlu taanna perorsaasutut ilinniarnermik aallartitsisut Sisimiuni 20-upput, Nuummilu 23-iullutik.
Nalinginnaasumik perorsaasutut ilinniarneq ukiunik pingasunik affarmillu sivisussuseqarpoq, najugarisarlu qimannagu perorsaasutut ilinniarneq ukiunik pingasunik sivissuseqarluni.
