Naja Petersen (A): Uparuaaneq paasisinnaanngilara

Partii Siumup Atassummik Qaasuitsup Kommunissaani Ikaarsaariarnermut Ataatsimiititaliamik suleqateqarnerminik taamaatitsinera, Atassummik suleqatiginninnerup naammaginannginneranik pissuteqartoq, Palle Jeremiassen Siumut sinnerlugu oqarpoq. Atassutip ilaasortaatitaasa takkunneq ajornerat pissutaaqataanerarpaa. Atassutip ikaarsaariarnermi ataatsimiititaliami ilaasortaatitaasa ilaata uparuaaneq paasisinngaanngilaa, Naja Petersen ima oqarpoq:

- Uani avissaartuunnermi Atassummit isumaqarpugut oqaloqatigiinnerit peqqaarsimasinnaagaluartut kisianni taamaattoqanngilaq.

- Tamanna piffissaqannginnerup kingunerinngilaa, tassami qinikkat arlariinnik suliffeqartut namminneerlutik aalajangissavaat sorleq ingerlatissallugu. Ilaasortagut peqataasinnaanngikkaangata tullersortit peqataatinneqartarput taakkulu taasisinnaanissamut periarfissaqarput. Taamaattumik peqataasoqartannginnerata utoqqatsissutigineqarnera tupigusuutigaarput, Naja Petersen (A) oqarpoq.

Siumukkut ataatsimeeqateqarnerat ataqqillugu utaqqivarput. Partiit tamaasa oqaloqatiginissaannut ammaffigivagut atassut eqinnaattuugami arlaannilluunniit suleqateqarsinnaasarpoq. Siumut aamma periarfissaqarsinnaallutik oqarnikuupput, Naja Petersen naggasiivoq.

Kristian Jeremiassen, Atassut sinnerlugu inatsisartuni aamma Qaasuitsup kommuneani ikaarsaariarnermut ataatsimiititaliami ilaasortaq ajuusaarpoq, nassuerutigalugulu nammineq maannamut ataasiaannarluni ikaarsaariarnermut ataatsimiititaliami ataatsimeeqataasimalluni.